Жамиятда тотувлик ва барқарорликни таъминлашда, шунингдек ёшлар ўртасида таълим ва диний маърифатни тарғиб қилиш мақсадида Ўзбекистондаги Шанхай ҳамкорлик ташкилоти Халқ дипломатияси маркази Ўзбекистон Республикаси Олий Мажлиси Қонунчилик палатасининг Халқаро ишлар ва парламентлараро алоқалар қўмитаси ҳамда Ислом цивилизацияси маркази ва Конрад Аденауэр жамғармасининг Марказий Осиёдаги минтақавий ваколатхонаси билан ҳамкорликда “Динлар ва маданиятларнинг ўзаро ҳамжиҳатлигида ҳамда тинчлик ва тотувликни мустаҳкамлашда таълим ва диний маърифатнинг ўрни” мавзусида халқаро конференцияси ташкил этилди.


«Кўкалдош» ўрта махсус ислом таълим муассасаси мудири Муҳаммадамин Насриев халқаро анжуманда иштирок этди

Конференция ишида Ўзбекистон Республикаси Олий Мажлиси депутатлари, Ўзбекистон Республикаси Вазирлар Маҳкамаси ҳузуридаги Дин ишлари қўмитаси, Мусулмонлар идораси, Ўзбекистон халқаро ислом академияси, мамлакатимиздаги дипломатик корпус, халқаро ташкилотлар, диний конфессиялар вакиллари, эксперт олимлар, миллий маданий марказлар раҳбарлари ва журналистлар қатнашди.


Анжуманда Ўзбекистоннинг ташқи дунё билан кўп томонлама дипломатиясида цивилизациялараро мулоқотни ривожлантириш, миллатлараро тотувлик, диний бағрикенгликни мустаҳкамлаш, умуминсоний қадриятларни асраб-авайлаш ҳамда ёшлар онгига ушбу эзгу ғояларни сингдириш масалалари муҳокама қилинди.
«Кўкалдош» ўрта махсус ислом таълим муассасаси матбуот хизмати






