“Koʻkaldosh” oʻrta maxsus islom bilim yurti mudiri, islomshunoslik fanlari boʻyicha falsafa doktori (PhD) M. Erkayev tomonidan Toshkent viloyati otinoyilari uchun tashkil etilgan malaka oshirish darsida “Dunyoning diniy manzarasi va din bilan bogʻliq geosiyosiy jarayonlar tahlili” mavzusida mazmunli va dolzarb maʼruza oʻqildi.


Maʼruza davomida zamonaviy dunyoda dinning oʻrni, uning jamiyat hayotiga taʼsiri hamda global miqyosda yuz berayotgan geosiyosiy jarayonlar bilan oʻzaro bogʻliqligi keng tahlil qilindi. Xususan, diniy omilning xalqaro munosabatlarda muhim vosita sifatida namoyon boʻlayotgani, ayrim hududlarda esa din niqobi ostida turli siyosiy manfaatlar ilgari surilayotgani misollar asosida tushuntirib berildi. Shuningdek, diniy bagʻrikenglik, konfessiyalararo totuvlik va millatlararo hamjihatlikni taʼminlash bugungi kunning ustuvor vazifalaridan biri ekani taʼkidlandi.


M. Erkayev oʻz maʼruzasida diniy bilimlarning toʻgʻri va ilmiy asosda yetkazilishi, ayniqsa, jamiyatda maʼnaviy barqarorlikni mustahkamlashda muhim ahamiyat kasb etishini qayd etdi. U zamonaviy axborot makonida turli buzgʻunchi gʻoyalarning tarqalish xavfi ortib borayotganini, bunday tahdidlarga qarshi kurashishda mutaxassislarning masʼuliyati yuqori ekanini alohida urgʻuladi. Shu nuqtai nazardan, otinoyilarning bilim va koʻnikmalarini muntazam ravishda oshirib borish zarurligi qayd etildi.
Tadbir yakunida ishtirokchilar oʻzlarini qiziqtirgan savollarga javob oldilar hamda mavzu yuzasidan fikr almashdilar. Mazkur malaka oshirish darsi tinglovchilarning diniy va ijtimoiy jarayonlarga nisbatan yanada chuqurroq va tahliliy yondashuvini shakllantirishda muhim ahamiyat kasb etdi.
©️ Koʻkaldosh oʻrta maxsus islom bilim yurti Matbuot xizmati





