Bugun, 19-yanvar sanasida Koʻkaldosh oʻrta maxsus islom bilim yurti “Imom-xatiblar oldida turgan dolzarb masalalar” mavzusida mazmunli va samarali davra suhbati boʻlib oʻtdi.
Mazkur tadbirda Toshkent viloyati bosh imom-xatibi, Oʻzbekiston musulmonlar idorasi Ulamolar kengashi aʼzosi Doniyor domla Ikromov ishtirok etdi.
Hurmatli mehmonni bilim yurti mudiri, islomshunoslik fanlari boʻyicha falsafa doktori (PhD) M. Erkayev hamda maʼnaviy-maʼrifiy ishlar boʻyicha mudir oʻrinbosari A. Gʻaniyev samimiy tarzda kutib oldilar. Tadbirda bilim yurti ustozlari va talabalar faol ishtirok etdilar.



Davra suhbatini bilim yurti mudiri M. Erkayev ochib berdi. U oʻz kirish soʻzida bunday uchrashuvlar bugungi kunda imom-xatiblar zimmasidagi masʼuliyatni chuqur anglash, zamon talablari bilan hamnafas boʻlish va yoshlar ongida sogʻlom diniy dunyoqarashni shakllantirishda muhim ahamiyat kasb etishini taʼkidladi. Shundan soʻng soʻz Toshkent viloyati bosh imom-xatibi, Oʻzbekiston musulmonlar idorasi Ulamolar kengashi aʼzosi Doniyor domla Ikromovga berildi.


Doniyor domla oʻz nutqida imom-xatiblar faoliyatida uchrayotgan dolzarb masalalar, xususan:
• jamiyatda diniy savodxonlikni oshirish,
• yoshlarni turli yot gʻoyalardan asrash,
• masjid va mahalla hamkorligini mustahkamlash,
• ijtimoiy tarmoqlarda masʼuliyat bilan chiqish qilish,
• vaʼz va maʼruzalarni zamon ruhiga mos, tushunarli va taʼsirchan tarzda yetkazish
kabi masalalar haqida atroflicha toʻxtalib oʻtdi.
Nutq davomida u quyidagi mazmundagi fikrlarni bildirdi:
“Bugungi imom-xatib nafaqat masjid minbarida, balki jamiyatning har bir jabhasida ibrat boʻla olishi kerak.”
“Yoshlar qalbiga yoʻl topish uchun avvalo ularni tinglashni, ularning savollariga ilm va hikmat bilan javob berishni oʻrganishimiz zarur.”
“Imom-xatib — tinchlik, bagʻrikenglik va maʼnaviyat targʻibotchisidir.”
Davra suhbati davomida talabalar va ustozlar tomonidan qiziqarli savollar berildi, amaliy hayotga oid masalalar muhokama qilindi. Domla savollarga batafsil va hayotiy misollar asosida javoblar berib, yoshlarga muhim tavsiyalarini ulashdi.
Tadbir yakunida talabalar oʻzlarini qiziqtirgan savollarga yetarli javoblar oldilar. Uchrashuv samimiy muhitda oʻtib, yakunda duo-xayrlar qilindi.



Mazkur davra suhbati talaba-yoshlar uchun katta maʼnaviy saboq boʻlib, ularning kelgusidagi ilmiy va amaliy faoliyatida muhim oʻrin egallashi shubhasiz.
Saidakramov Saidazimxon
“Koʻkaldosh” OʻMIBY Yoshlar bilan ishlash, maʼnaviyat va maʼrifat boʻlimi uslubchisi





