«Koʻkaldosh» oʻrta maxsus islom bilim yurtida 4-sentabr kuni Respublikamiz Mustaqilligining 32 yilligini munosib nishonlash hamda 2023-2024 oʻquv yili boshlanishi munosabati bilan “YANGI HAYOT UCHUN, YANGI OʻZBEKISTON UCHUN!” shiori ostida bayram tadbiri boʻlib oʻtdi.
Bayramona tadbirga Oʻzbekiston musulmonlari idorasi raisi oʻrinbosari Uygʻun Gʻofurov, taʼlim va ilmiy tadqiqodlar boʻlimi mutaxassisi Sherzod Сhoʻlponov, Vazirlar mahkamasi huzuridagi Din ishlari boʻyicha qoʻmita taʼlim boʻlimi masʼul xodimi Elyor Alimqulov, “Shayx Muhammad Sodiq Muhammad Yusuf” jome masjidining imom-xatibi Ismoil Muhammad Sodiq Muhammad Yusuf, “Minor” jome masjidining imom-xatibi Dr. Sayyid Rahmatulloh Termiziy hamda talabalarning ota-onalari va faxriy ustozlar taklif etildi. Tadbirda bilim yurti mudarrislari, ishchi-xodimlar va barcha talabalar ishtirok etdilar.
Tadbir Respublikamiz madhiyasi bilan boshlandi.
Tadbirni bilim yurti mudiri Abdulhakim qori Matqulov kirish qismi bilan ochib berdi.
Shundan soʻng Oʻzbekiston musulmonlari idorasi raisi oʻrinbosari Uygʻun Gʻofurov soʻzga chiqdi.
Tashrif buyurgan mehmonlardan “Shayx Muhammad Sodiq Muhammad Yusuf” jome masjidining imom-xatibi Ismoil Muhammad Sodiq Muhammad Yusuf, “Minor” jome masjidining imom-xatibi Dr. Sayyid Rahmatulloh Termiziy tabrik va pandu-nasihat uchun soʻzga chiqishdi.
Tadbirning ikkinchi qismida «Koʻkaldosh» oʻrta maxsus islom bilim yurti 2022-2023-oʻquv yilini namunali xulqi va aʼlo baholar bilan tamomlagan talabalar munosib taqdirlandi.
Yurtimiz ravnaqi va dinimiz rivoji yoʻlida fidokorona mehnati, yosh avlodni tarbiyalashda, diniy-maʼrifiy ishlar samarasini oshirishga munosib hissa qoʻshayotgani, ayniqsa, yoshlarni Vatanga sadoqat, milliy qadriyatlarga hurmat, diniy bagʻrikenglik va millatlararo totuvlik ruhida tarbiyalashdagi ulkan xizmatlari uchun Dr. Shayx Sayyid Rahmatulloh Termiziy va Shayx Ismoil Muhammad Sodiq Muhammad Yusuf hazratlari «Koʻkaldosh» oʻrta maxsus islom bilim yurti tomonidan «FAXRIY USTOZ» darajasi bilan taqdirlandilar.






Madrasada xizmat qilib oʻtgan faxriy ustozlarni xotirlab Qurʼoni karim tilovat qilindi va ularning ruhi poklariga bagʻishlanib duolar qilindi.










Tadbirdan soʻng barcha talabalar “Mustaqillik darsi”ni oʻtish uchun oʻquv xonalarga kirishdi.
Koʻkaldosh oʻrta maxsus islom bilim yurti matbuot xizmati





