Hikoyalarda aks etgan “qirq hadis”.
Farzandlarimiz uchun…
15-hadis
Bu voqea muborak Ramazon kunlarining birida boʻlgan edi. Iftorlik vaqtiga yaqin qolganda Adham yangi yopilgan non sotib olish uchun novvoyxonaga bordi. Novvoyxona oldida koʻpgina insonlar navbatda turar edi. Iftorlik vaqti yaqin qolganligi bois navbatda turgan insonlar betoqat boʻlar, novvoy ham imkon qadar tezroq ishlashga harakat qilar edi. Albatta bir vaqtning oʻzida nonlarni xaridorlarga uzatish va ularning pullarini sanab olish oson emasdi. Adhamning navbati iforlikka juda oz soniyalar qolganida yetib keldi. Charchab qolgan sotuvchi unga keragidan ortiq qaytim berib yubordi. Adham ikkilanib bir qoʻlidagi pullarga bir sotuvchiga qarab turib qoldi. Novvoy unga qarab: “Tinchlikmi, hammasi joyidami, bolakay?” – dedi. Adham esa: “Hammasi yaxshi”-dedi-da, pullarni koʻtargancha uyiga yugurib ketdi. Kechki ovqat vaqtida u bir oz oʻychan koʻrinar edi. Kechqurun oʻz joyiga yotganida uning bezovtaligi yanada ortdi. Goʻyoki kimdir gʻoyibdan unga: “Sen nega bunday yoʻl tutding? Nega birovning haqqiga xiyonat qilding?”- degandek boʻlaverar edi. Adham boʻlib oʻtgan voqealarni hammasini onasiga aytib berishga qaror qildi-yu ammo darhol bu fikridan qaytdi. Onasi bu ishi sababli qattiq urishishidan va uyaltirishidan qoʻrqdi. Tuni bilan bosinqirab gʻalati tushlar koʻrib uygʻongan Adhamni saxarlik vaqtida ham bezovtalik tark etmagan edi. Kunduzi uning koʻzi devorda ilinib turgan taqvimga tushdi. Taqvimga yaqinroq borganida uning ochiq sahifasida yozilgan Rosululloh sollallohu alayhi va sallamning quyidagi hadislarini oʻqidi:
“الإثم ما حاك في صدرك و كرهت أن يطلع عليه الناس” (رواه مسلم)
“Gunoh bu – qalbingni qiynagan va sen boshqalar uni bilib qolishidan qoʻrqadigan amaldir” (Muslim rivoyati)
Adhamning yuzlari qizarib ketdi. Goʻyoki Rosululloh sollallohu alayhi va sallam bu hadisni aynan u uchun aytgandek edi. U toʻgʻri novvoyxonaga bordi. Soʻngra novvoydan uzr soʻrab oʻziga tegishli boʻlmagan pullarni qaytarib berdi. Adham naqadar toʻgʻri ish qildi va oʻzini gunohdan saqlab qoldi!
Oxunjon AHMEDOV tarjimasi
«Koʻkaldosh» OʻMIBY mudarrisi






