Бугун қўлда мактуб битиш узоқ ўтмишга айланиб қолгандек. Нафақат оддий одамлар, балки ёзувчилару журналистларнинг ҳам кўпчилиги бугун қоғоз, қаламдан йироқлашгандек. Уяли телефонларнинг кичик катакчалари ёхуд компьютер клавиатурасида ҳарф теришга бармоқларимиз мослашиб кетди. Ахборотдан қандай фойдаланишимиз ва ҳатто ҳаётимизни қандай ташкил қилишимизда технология жуда муҳим аҳамият касб этмоқда.
Фикрларни кундаликка ёзиш дейсизми, саналарни хотиралар билан бирга қайд этиб бориш, шеър ёзиб кўришга ҳаракат қилиш ёки роман ёза бошлашга уринишми – фарқи йўқ: “эскирган” қалам ва қоғоз ҳиссий ҳолатимизга катта таъсир кўрсатади, бу ўқувчиларнинг фикрларини тартибга солиш ва ҳатто кайфиятларини яхшилашга ёрдам беради.
Қуйида қўл билан ёзишнинг баъзи фойдаларини келтириб ўтамиз:
- Стрессни йўқотади. Ёзиш ҳаракатининг ўзи стрессни камайтириши мумкин, бу эса дарс давомидаги диққат ва эътиборни яхшилашга ёрдам беради.
- Ижодкорлик ва фикрлашга ундайди. Ёзувни одатга айлантириш, ижодкорликни ошириши ва тафаккурни чуқурлаштириши, мия фаолиятини ўткирлаштириши аниқланган.
- Хотирани чархлайди. Қўл билан ёзиш, шунингдек, хотирани ва қайта эсга тушириш қобилиятини ошириши фанга маълум. Қаламни қоғозда ҳаракатлантириш миянинг фаоллашишини таъминлайди, бу эса ўқувчининг англаш қобилиятини оширишга ёрдам беради. Бундан ташқари қўлда ёзиш жараёнида клавиатурада ёзишдан кўра кўпроқ сезгирлик ва моторли нейронлар иштирок этади.
- Туйғулар сокинлигини беради. Ҳис-кечинмалар ҳақида ёзиш кайфиятни яхшилаши ва хотиржамлик ҳиссини уйғотиши мумкин. Қаламни саҳифага қўйишнинг ўзиёқ ёрқин фикрларни юзага келтириши ва буларни тартибли равишда намойиш этишга ёрдам беради, бу эса руҳиятдаги оғирликларни енгиллаштиришга сабаб бўлади.
- Миннатдорчилик ҳисси. Баъзи тадқиқотлар шукур қилиш ҳақида ёзиш, айниқса ётишдан олдин, уйқуни яхшилашга ёрдам бериши мумкинлигини кўрсатади. Шундай ҳолларда эртангги куни бўладиган таълим жараёнининг яхши натижаларни келтириб чиқариши турган гап.
Ана шу фойдали жиҳатларни ҳисобга олган ҳолда бизнинг мадрамизда турли мавзуларда иншолар танлови ўтказилиб келади. Аввалги хабарларимизда “Кўкалдош” ўрта махсус ислом таълим муасссасасига Ўзбекистондаги Ислом цивилизацияси маркази етакчи ходимлари ташриф буюриб, “Мусулмон шарқида илм-фан ривожи ва ҳозирги замон” мавзусида илмий-маърифий суҳбат бўлиб ўтганини айтган эдик. Ана шу тадбирнинг давоми ўлароқ, “Кўкалдош” ўрта махсус ислом таълим муасссасаси ва Ислом цивилизацияси маркази билан ҳамкорликда мадраса талабалари ўртасида “Мусулмон шарқида илм-фан ривожи ва ҳозирги замон” мавзусида иншолар танлови ўтказилди. Бу танловда ҳар бир курсда етакчи бўлган икки нафардан, умумий 26 нафар талаба иштирок этди.
Танловда иштирок этган талабалар яқин шарқда ижод қилиб ўтган уламолар, уларнинг илм-фан ривожига қўшган ҳиссалари, уларнинг қилган ҳизматлари бугунги кунгача ўз аҳамиятини йўқотмаганлигини мисоллар орқали ёритиб берганликлари танлов натижаларидан маълум бўлди.

Бугун ана шу иншолар танловини якуний қисми бўлиб ўтди. Иншолар танловида ғолиб бўлган талабаларни тақдирлаш учун Ўзбекистондаги Ислом цивилизацияси маркази бўлим бошлиғи Муҳаммадиев Фаҳриддин ташриф буюрдилар ва талабаларга Ислом цивилизацияси маркази томонидан берилган сертификат, ҳамда қимматбаҳо совғаларни тақдим қилдилар.
Иншолар танловида, барча иштирокчилар юқори кўрсаткичларни қайд этишди. Биз уларнинг орасидан қуйидаги 3 талабани саралаб олдик:
1-ўрин. 201-гуруҳ талабаси Абдурасулов Элдор
2-ўрин. 403-гуруҳ талабаси Ҳазратқулов Дўстмуҳаммад
3-ўрин. 101-гуруҳ талабаси Борлибоев Ҳамидуллоҳ



Тадбир сўнгида Ислом цивилизацияси маркази бўлим бошлиғи Муҳаммадиев Фаҳриддин ушбу ҳамкорлик учун цивилизация маркази раҳбарияти номидан “Кўкалдош” ўрта махсус ислом таълим муасссасасига миннатдорчилик билдирдилар ва марказ томонидан тақдим қилинган Ташаккурномани топширдилар.



Бу ҳадияларга муносиб тарзда меҳмонларимизга ҳам эсдалик совғаларини топшириб, уларни ҳушнуд этдик. Ушбу ҳамкорлик учун “Кўкалдош” ўрта махсус ислом таълим муасссасаси Ислом цивилизацияси марказига ўз миннатдорчилигини билдиради ва келажакада ҳам ана шу ҳамкорлик бардавом бўлишини сўраб қолади.
Р.Саиджалолов
Ёшлар билан ишлаш, маънавият ва маърифат бўлими ходими






