SIGN IN YOUR ACCOUNT TO HAVE ACCESS TO DIFFERENT FEATURES

FORGOT YOUR PASSWORD?

FORGOT YOUR DETAILS?

AAH, WAIT, I REMEMBER NOW!
KUKALDOSH.UZ
  • LOGIN

KUKALDOSH.UZ

  • Bosh sahifa
  • Madrasa
    • Madrasa tarixi
    • Rahbariyat
    • Yotoqxona
    • Axborot-resurs markazi
  • Yangiliklar
  • Maqolalar
    • Qurʼon ilmlari
    • Aqida
    • Fiqh
    • Tafsir
    • Hadis
    • Arab tili
    • Yurtimiz allomalari
    • Islom tarixi
    • Raddiyalar
    • Axloq va tarbiya
    • Bagʼrikenglik va jamiyat
    • Elektron kitoblar
  • Taʼlim
    • 4 yillik öquv dasturi
    • Ilm talab qilish odoblari
  • Kurslar
    • Qurʼoni Karim va tajvid kursi
    • Tayyorlov kursi
  • Qabul
    • Qabul tartibi
    • Kiriş imtihonlari 2027-2028
    • Ötiş ballari
    • Topşirganlar soni
    • Imtihon duolari
  • Boğlaniş
УБОДА ИБН СОМИТ (розияллоҳу анҳу)
23.04.2019 / Bo‘limda Maqolalar, Yurtimiz allomalari

УБОДА ИБН СОМИТ (розияллоҳу анҳу)

Саҳоба ҳижратдан 38 йил олдин, милодий 586 йили Мадина шаҳрида туғилган. Унинг тўлиқ исми Убода ибн Сомит ибн Қайс ибн Асром Хазражий Ансорий. У Абу Валид куняси билан машҳур бўлган.

Отаси Сомит ибн Қайс ибн Асром ибн Фиҳр Хазражий. Онаси Қурротулайн бинт Убода ибн Надла ибн Молик ибн Ижлан ибн Зайд Хазражий. Саҳобанинг Авс ибн Сомит номли акаси, Валид ва Муҳаммад исмли ўғиллари бўлган.

Убода (розияллоҳу анҳу) биринчи Ақаба байъатида Исломни қабул қилган 12 кишидан бири эди. Ўша йили Каъба зиёратига Хазраж қабиласидан ўн, Авс қабиласидан икки киши келди. Саҳоба иккинчи Ақаба байъатида Хазраж қабиласининг элчиларидан бири бўлди.

Убода ибн Сомит (розияллоҳу анҳу) узун бўйли, чиройли, хушбичим ва зоҳид киши эди. У зотнинг Аллоҳга бўлган тақвоси туфайли юқори мартабаларга эришди. Ҳазрати Умар (розияллоҳу анҳу) Абу Валид (розияллоҳу анҳу) тақво ва адолатда барчага намуна бўлгани учун Фаластинга қози қилиб тайинлаганлар.

Убода (розияллоҳу анҳу) ҳофизи Қуръон эди. Суффа аҳлларига Каломуллоҳни ўргатарди. Пайғамбаримиз (соллаллоҳу алайҳи ва саллам)нинг вафотларидан кейин Шомга кўчиб ўтди. Бу ҳақида Муҳаммад ибн Каъб айтади: “Набий (соллаллоҳу алайҳи ва саллам)нинг даврида ансорлардан беш киши Қуръони каримни жамлаган. Улар Муоз ибн Жабал, Убода ибн Сомит, Убай ибн Каъб, Абу Аюб Ансорий ва Абу Дардо (розияллоҳу анҳум). Ҳазрати Умар (розияллоҳу анҳу) халифалик даврида, Язид ибн Абу Суфён амирул мўмининга Қуръон ўргатувчи муаллим юборишини сўраб, хат ёзади: “Шом аҳли кўп. Улар Қуръони карим ва фиқҳдан таълим берадиган устозга муҳтож. Бизга ёрдам беринг!”. Умар (розияллоҳу анҳу) Абу Аюб, Убай, Убода, Муоз ва Абу Дардо (розияллоҳу анҳум)ни чақириб, уларга ёрдам бериш лозимлигини айтади. Абу Аюб ёши катта, Убай ибн Каъбнинг касал бўлганлиги сабабли бу муҳим вазифа Убода ибн Сомит, Муоз ибн Жабал ва Абу Дардо (розияллоҳу анҳум) зиммасига юклатилади. Убода ибн Сомит Ҳимсга, Абу Дардо Дамашққа, Муоз ибн Жабал Фаластинга Қуръони каримдан таълим бериш учун юборилaди”.

Убода ибн Сомит (розияллоҳу анҳу) Набий (соллаллоҳу алайҳи ва саллам)дан 181 тa ҳадис айтган. У зотдан Абу Умома Боҳилий, Анас ибн Молик, Абу Муслим Хавлоний, Жубайр ибн Нуфайр, Жунода ибн Абу Умайя, Абдураҳмон ибн Усайла, Маҳмуд ибн Робиъ, Абу Идрис Хавлоний, ўғли Валид ибн Убода каби улуғ саҳобалар ва кўплаб тобеинлар ҳадис ривоят қилишган. Булардан oлтитаси муттафақун алайҳ, иккитасини Имом Бухорий (раҳматуллоҳи алайҳи) ва иккитасини Имом Муслим (раҳматуллоҳи алайҳи) ўз тўпламларида келтиришган.

Пайғамбаримиз (соллаллоҳу алайҳи ва саллам) Убода ибн Сомит (розияллоҳу анҳу)ни муҳожирлардан Убай Мурсода Ғонавий билан биродар қилиб қўйганлар.

Улуғ саҳобий Бадр, Уҳуд ва Хандақ жангларида Расулуллоҳ (соллаллоҳу алайҳи ва саллам)нинг ёнларида туриб, жанг қилган. Шунингдек, ҳижрий13 йил Ярмук жангида, 20 йилда эса Мисрни фатҳ қилинишида қатнашган.

Убода ибн Сомит (розияллоҳу анҳу) айтади: “Расулуллоҳ (соллаллоҳу алайҳи ва саллам) билан ёлғиз қолганимда У зотга: “Асҳобларингиз орасида қайси бири сизга энг севиклироқ, айтинг, мен ҳам уларни яхши кўрай дедим”. Набий (алайҳиссалом): “Менга ҳаётимда сирдош бўлганлар: Абу Бакр, Умар ва Али”. Сўнгра жим бўлиб қолдилар. Мен: “Яна ким, ё Расулуллоҳ?”, деб сўрадим. У зот (соллаллоҳу алайҳи ва саллам): “Зубайр, Талҳа, Саъд, Абу Убайда, Муоз, Абу Талҳа, Абу Аюб ва сен, эй Убода ва Убай ибн Каъб, Абу Дардо, Ибн Масъуд, Ибн Авф, Ибн Ато сўнгра Салмон, Суҳайб, Билол ва Аммор”, дедилар.

Амр ибн Ос (розияллоҳу анҳу) Мисрга сафари олдидан қўшинни қувватлаш мақсадида халифадан мадад сўрайди. Халифа Умар (розияллоҳу анҳу) ҳар бири минг кишидан иборат тўртта қўшин юборди. Уларга тўртта ҳаким бошлиқ тайинлади. Ҳазрати Умар (розияллоҳу анҳу): “Уларнинг ҳар бири мингта аскарга баробардир”, деб бошлиқларни мақтаган. Убода ибн Сомит (розияллоҳу анҳу) қўшинга бошчилик қилган тўртта баҳодир саҳобалардан бири бўлган.

Убода (розияллоҳу анҳу) Аллоҳнинг йўлида турли маломатлардан қўрқмас ва доимо ҳақ сўзни гапирарди. Муовия (розияллоҳу анҳу) Шомга волий бўлганида Убода ибн Сомит (розияллоҳу анҳу) билан бир масала устида тортишиб қолади. Шунда Убода (розияллоҳу анҳу) Муовияга хат ёзиб, у билан бир шаҳарда турмаслигини эълон қилиб, чиқиб кетади ва умрининг охиригача Рамла деган жойда яшайди.

Валид ибн Убода айтади: “Отамнинг олдига кирдим. У бетоб, ўлим арафасида эди. “Эй отажон, менга насиҳат қилинг, уни бажарай”, дедим. Отам: “Эй болажоним, яхшилик ва ёмонлик қадар (тақдир)дан эканига имон келтирмагунингча, имон таъмини тотмайсан ва Аллоҳ илми ҳақиқатининг моҳиятига етмайсан. Билгинки, сенга (яхшилик ёки ёмонлик) етмаган бўлса, у Аллоҳ таолонинг тақдири билан бўлди. Нимаики етган бўлса, у ҳам фақат Аллоҳнинг қадари биландир. Мен Расулуллоҳ (соллаллоҳу алайҳи ва саллам)нинг: “Албатта, Аллоҳ энг биринчи қаламни яратди, сўнгра унга: “Ёз”, деди ва у ўша соатдан қиёматгача бўладиган нарсаларни ёзди”, деганларини эшитганман. Эй болагинам, агар сенга ўлим етганда, шундай эътиқодда бўлмасанг, дўзахга тушасан”, деди (Имом Аҳмад ривояти).

Убода (розияллоҳу анҳу)нинг вафот онлари яқин қолди. У зот ўзини ҳовлига олиб чиқишларини ва болалари, ходимлари ва қўшниларини ҳузурига чақиришни буюрди. Улар йиғилишди. Улуғ саҳобий: “Бу дунёдаги сўнги, охиратдаги аввалги кунимдир. Қўлим ва тилим билан сизларга озор берганимни ёки азият етказмаганимни билмайман. Жоним қўлида бўлган зотга қасамки, қиёмат куни қасос олиниши ҳақдир. Сизлардан бирор кишига азият етказган бўлсам, жоним чиқишидан аввал қасос олсин!” деди. Улар: “Йўқ, одобли эдингиз”, дейишди. У зот: “Ё Аллоҳ гувоҳ бўлгин!” деди. Убода ибн Сомит (розияллоҳу анҳу): “Васиятимни ёдда тутинглар. Жоним чиққандан кейин, таҳорат олинглар. Таҳоратни чиройли ва мукаммал қилинглар. Сўнгра барча масжидга кириб, (жаноза) намоз ўқисин, Убода ва ўзи учун истиғфор айтсин. Аллоҳ таоло бундай марҳамат қилади: “(Аллоҳдан) сабр ва намоз ила ёрдам сўрангиз. Дарҳақиқат, у (намоз) оғир ишдир. Илло, итоатли (хокисор) кишиларга (оғир) эмас” (Бақара сураси, 45-оят). Мени қабримга тезроқ олиб боринглар. Менинг ортимдан олов эргашмасин, тагимга қизил мато ҳам тўшаманглар”, деб гапини якунлади.

Саҳоба ҳижрий 34 йили, 72 ёшда Дaмашқда вафот этган.

Манбалар асосида

“Кўкалдош” ўрта махсус ислом билим юрти мударриси

Баҳриддин Жўрабек ўғли тайёрлади.

 

 

 

What you can read next

Islom tinchlik va bagʻrikenglik dini
Islom tinchlik va bagʻrikenglik dini
Zahar
Plastik likopcha
Биткоин ҳақида
Биткоин ҳақида

СЎНГИ МАҚОЛАЛАР

  • Mustaqillik — uluğ ne’mat

  • Kitoblar bilan muomala qiliş odoblari va ularni qölga kiritişga tarğib

  • ILM AMAL BILAN KAMOLGA YETADI

  • Ustoz va şogirdga umumiy bölgan odoblar

  • Kökaldoş madrasasida Xalqaro bağrikenglik kuniga bağışlangan “Zakovat” intellektual öyini taşkil etildi

ҚИДИРУВ ХИЗМАТИ

БЎЛИМЛАР

  • Bosh sahifa
  • Madrasa
  • Yangiliklar
  • Maqolalar
  • Taʼlim
  • Kurslar
  • Qabul
  • Boğlaniş

Тезкор ҳаволалар

  • Qabul tartibi
  • Kiriş imtihonlari 2027-2028
  • Ötiş ballari
  • Topşirganlar soni
  • Qurʼoni Karim va tajvid kursi
  • Tayyorlov kursi
  • 4 yillik öquv dasturi
  • Imtihon duolari

АЛОҚА

Тошкент 100208, Чилонзор тумани, Гулистон кўчаси, 37/1

+998 94 988 23 43

info@kukaldosh.uz

ХАРИТА

KökaldoşKökaldoş

Yandex xarita →Google xarita →

© 2018 - 2026. kukaldosh.uz | Ўзбекистон Мусулмонлари идораси "Кўкалдош" ўрта махсус ислом билим юрти.
Барча хуқуқлар химояланган. Сайтдан маълумот олинганда манба кўрсатилиши шарт.
АОКА интернет-ОАВ гувоҳномаси рақами: 1221

TOP