Rasululloh sollallohu alayhi va sallamning otalari Abdulloh ibn Abdulmuttalib edilar. Abdulloh Omina binti Vahb bilan turmush qurdilar. Shu nikohdan Muhammad sollallohu alayhi va sallam dunyoga keldilar.
Abdulloh Rasululloh sollallohu alayhi va sallam hali tugʻilmasdan oldin vafot etgan edilar. Yaʼni u zot dunyoga kelganlarida otalari hayot emas edilar. Ayni shu holat Rasululloh sollallohu alayhi va sallamning yetimlikni boshdan kechirishlariga sabab boʻldi. Alloh taolo u zotga xitob qilib, Zuho surasida shunday marhamat qiladi:
أَلَمْ يَجِدْكَ يَتِيمًا فَآوَىٰ. ٦
“U zot sizni yetim holingizda topib, panoh bermadimi?” (Zuho surasi, 6-oyat).
Bu oyat Rasululloh sollallohu alayhi va sallamning bolalik davrlarini hamda Alloh taoloning u zotga boʻlgan alohida himoyasini anglatadi.
Rasululloh sollallohu alayhi va sallamning tavallud yillari siyrat kitoblarida “Fil yili” deb mashhur boʻlgan yil bilan bogʻlanadi.
Bu yilning “Fil yili” deb nomlanishiga sabab shuki, Habashiston noibi Abraha Kaʼbani buzish maqsadida Yamandan katta qoʻshin bilan Makkaga kelgan edi. Uning qoʻshini ichida fillar ham bor edi.
Abraha Allohning baytini vayron qilishni qasd qilgan boʻlsa-da, Alloh taolo oʻz baytini himoya qildi. Alloh taolo bu haqda Qurʼoni Karimning Fil surasida shunday marhamat qiladi:
أَلَمْ تَرَ كَيْفَ فَعَلَ رَبُّكَ بِأَصْحَابِ الْفِيلِ.١ أَلَمْ يَجْعَلْ كَيْدَهُمْ فِي تَضْلِيلٍ. ٢
“Robbing Fil egalariga nima qilganini koʻrmadingmi?! Ularning makrini zalolatga ketkazmadimi?!” (Fil surasi, 1–2-oyatlar).
Bu hodisa arjah — kuchliroq qavlga koʻra, Rasululloh sollallohu alayhi va sallamning tavalludlaridan taxminan ikki oy oldin, muharram oyida, milodiy 571-yil mart oyining avvalida, bahor fasli boshlanganida boʻlib oʻtgan.
Rasululloh sollallohu alayhi va sallamning muborak tavalludlari koʻpchilik ulamolar nazdida Fil hodisasining birinchi yilida, 12-rabiul avvalda, milodiy 571-yilning 23-aprelida boʻlgan.
Rasululloh sollallohu alayhi va sallamning onalari Omina binti Vahb edilar. U zot oʻgʻillariga yuksak mehr koʻrsatdilar.
Rasululloh sollallohu alayhi va sallam olti yoshga yetganlarida onalari Madinaga safar qildilar va bu safarga oʻgʻillari Muhammad sollallohu alayhi va sallamni ham olib bordilar. Ammo Makkaga qaytish yoʻlida Abvo degan joyda Omina vafot etdilar. Rasululloh sollallohu alayhi va sallamni Makkaga enagalari Ummu Ayman olib keldilar.
Shu tariqa Muhammad sollallohu alayhi va sallam olti yoshlarida ham otalaridan, ham onalaridan ayrilgan yetim bola boʻlib qoldilar.
Keyin u zotni bobolari Abdulmuttalib oʻz qaramogʻiga oldilar.
Davomi bor…
✒️ “Koʻkaldosh” oʻrta maxsus islom taʼlim muassasasi oʻqiruvchisi Ikrom Roʻzikulov





