Koʻkaldosh oʻrta maxsus islom bilim yurtida 2024-2025-oʻquv yilining birinchi yarim yillik natijalari sarhisob qilinar ekan, yarim yillikni “aʼlo baholar bilan yakunlab, bilimi va odobi bilan boshqalarga oʻrnak boʻlgan talaba”, “Ilm-marifatga chanqoq – kitobsevar talaba” va “Talabalar turar joyida ichki tartibga amal qilib, goʻzal odobi bilan ajralib turgan talaba” yoʻnalishlari boʻyicha bir nechta talabalar taqdirlandilar.
Tadbirda “Koʻkaldosh” oʻrta maxsus islom bilim yurti mudiri, islomshunoslik fanlari boʻyicha falsafa doktori, (PhD) M.Erkayev, Yoshlar ishlari, maʼnaviy va marifiy ishlar boʻyicha mudir oʻrinbosari A.Gʻaniyev, Oʻquv ishlari boʻyicha mudir oʻrinbosari N.Jalolov, barcha ustozlar va talabalar qatnashishdi.






Tadbir davomida “Koʻkaldosh” oʻrta maxsus islom bilim yurti mudiri, islomshunoslik fanlari boʻyicha falsafa doktori, (PhD) M.Erkayev soʻzga chiqib, barcha iqtidorli talabalarni tabrikladi va ularga kelgusidagi ilm yoʻlidagi say’-harakatlarida ulkan muvaffaqiyatlar tiladi. Oʻz nutqida yurtimiz taraqqiyotiga hissa qoʻshadigan, maʼnaviy yetuk va ilmli yoshlar yetishib chiqishining naqadar muhim ekanligini taʼkidladi.
Tadbir soʻngida talabalarga faxriy yorliqlar topshirildi va ota-onalariga esa tashakkurnomalar taqdim etildi.
Mazkur tashakkurnomada quyidagilar izhor qilindi: “Har bir insonning komil shaxs boʻlib voyaga yetishida, yetuk kasb egasi boʻlib jamiyatda oʻz oʻrnini topishida ustoz-murabbiylar hamda ota-onalarning oʻrni juda ham muhimdir. Fidoyi, zahmatkash ustozlar oʻz shogirdlariga bilim berish barobarida ular qalbiga insonga xos eng goʻzal ezgu xislatlarni, mehr-oqibat va odamiylik tuygʻularini singdirib boradi.
Haqiqatan ham, insonni inson qilib kamol toptirishda, unga bilim va odamiylik, mehr-oqibat ezgu orzu-niyatlar bilan yashash tuygʻularini singdirishda, bir soʻz bilan aytganda, jamiyatimizning munosib fuqarosi boʻlib hayotga qadam qoʻyishi va mustahkam oʻrin olishida oʻqituvchi va murabbiylarning hissasi bilan bir qatorda ota-onalarning farzandiga bergan tarbiyasi ham beqiyosdir.
Farzandingiz madrasa talabalari oʻrtasida namunali xulqi, ilmga chanqoqligi, jamoat ishlarida faolligi bilan ajralib turadi. Ana shunday namunali xulqli, ustozlarni ehtirom qiladigan, darslarda hamisha faol, goʻzal muomalali, bilim yurti tomonidan tashkil etiladigan jamoat ishlarida faol ishtirok etadigan, tengdoshlariga oʻrnak boʻladigan farzand tarbiyalaganingiz uchun bilim yurti rahbariyati sizlarga oʻz tashakkurini izhor qiladi.”
Bu eʼtirof va mukofotlar yoshlarni yana-da ilmga, odob-axloqqa va intizomga undab, kelgusida yanada katta marralarni zabt etishga ruhlantirdi.
Saidazimxon SAIDAKRAMOV
«Koʻkaldosh» OʻMIBY Yoshlar bilan ishlash, maʼnaviyat va maʼrifat boʻlimi uslubchisi






