13 январь куни “Кўкалдош” ўрта махсус ислом билим юрти талабалари “14- январ Ватан ҳимоячилари куни” байрами муносабати билан Тошкент шаҳрининг Олмазор туманидаги Ғалаба боғида саёҳат уюштирдилар. 2-жаҳон уруши ҳақида ҳикоя қилувчи материаллар билан танишиб, ватан ҳимояси ҳақидаги тасаввурларини бойитдилар.
Ушбу мемориал мажмуа 2020 йилда Ўзбекистон Республикаси Президентининг ғояси ва ташаббуси билан инновацион технологиялар асосида, Ўзбекистон халқининг II жаҳон урушида кўрсатган беқиёс жасоратини абадийлаштириш мақсадида бунёд этилган. «Ғалаба боғи» ёдгорлик мажмуаси ва «Шон-шараф» давлат музейи экспозициялари халқимизнинг уруш йилларида кўрсатган мардлик ва матонатини, юксак инсоний фазилатларини намоён этиш ҳамда ёш авлодни она Ватанга садоқат руҳида тарбиялашга хизмат қилади.
Мажмуа рамзий 12 та ҳудудга бўлинган бўлиб, кириш қисми, урушнинг даҳшатли қиёфаси, марказий хиёбон, ҳарбий техникалар майдончалари, темир йўл вокзали, фронт орти ҳудуди, амфитеатр ва маъмурий бино, мотам ва андуҳ ҳудуди, шоду хуррамлик ҳудуди, ғалаба ҳудуди, «Шон-шараф» давлат музейи ва шукроналик ҳудудидан ташкил топган.
Боғда уруш ва унинг оқибатлари, уруш даври манзаралари, жумладан, окоп ва блиндажлар, палаткалар, дала ошхоналари ва бошқа лавҳалар акс этган. Мажмуада ўша даврдаги ҳарбий техника ва қурол-яроғлар, Ўзбекистон халқининг фронт ва фронт ортида кўрсатган жасорати, машаққатли меҳнати, қайғу-алами, шунингдек, эришилган буюк ғалабага қўшган улкан ҳиссаси ифодаланган.
“Кўкалдош” билим юрти талабалари «Кўз ёши» мажмуасидаги лавҳа ва экспонатлар воситасида урушнинг анчли манзарасига гувоҳ бўлдилар. «Шон-шараф» давлат музейининг юқори қисмида Иккинчи жаҳон урушида қатнашган 301 нафар қаҳрамонларимиз шарафига экилган дарахтлар бўйлаб кездилар, шунингдек, «Мангу жасорат» деб номланган мажмуада афсонавий ўзбек генерали Собир Раҳимов ва ўзбекистонлик ботир жангчиларни хотирладилар.
Мажмуа бўйлаб саёҳат илм толибларига бугунги тинчлик-осойишталик, фаровон ҳаёт қанчалик бебаҳо неъматлиги, уни кўз қорачиғидек асраб-авайлаш лозимлиги ҳамда ватан сарҳадларини қўриқлаш шарафли ва машаққатли вазифа эканини англатди.
“Кўкалдош” ўрта махсус
ислом билим юрти матбуот хизмати.
