Жисмоний тарбия ва спорт билан мунтазам шуғулланиш аҳолимиз, айниқса ёш авлоднинг соғлиғини мустаҳкамлашда муҳим ўрин тутади. “Кўкалдош” ўрта махсус ислом таълим муассасасида спортга катта эътибор берилади. Талабаларнинг бўш вақтларини мазмунли ўтказиш мақсадида улар ўртасида шахмат, тош кўтариш, кураш, футбол ва стол тенниси бўйича “Баркамол авлод” спорт мусобақаси мунтазам равишда ўтказилиб турилади. Унда ғолиб бўлган талабалар Республика босқичига йўлланма олиб ушбу босқичда фахрли ўринларни эгаллаб келмоқдалар.
Таълим муассасасида 12 январ куни Ўзбекистон Республикаси жисмоний тарбия ва спорт вазирлиги, Ўзбекистон миллий олимпия қўмитаси, Шайхонтоҳур туман ҳокимлиги спорт бўлими ҳамда “Кўкалдош” ўрта махсус ислом таълим муассасаси ҳамкорлигида “14- январ Ватан ҳимоячилари куни” ҳамда 2021 йил — “Ёшларни қўллаб-қувватлаш ва аҳоли саломатлигини мустаҳкамлаш йили” муносабати билан “Спортни сев, спорт билан яша” шиори остида барча курс талабалари иштирокида курслараро шахмат мусобақаси ташкил этилди. Мусобақа ўйинлари жуда қизиқарли ва муросасиз кечди. Ушбу мусобақанинг финал босқичида 1-курс талабаси Норбоев Дилшод 3-ўрин, 1-курс талабаси Абдулазизов Нурмухаммад2-ўрин ва 2-курс талабаси Ахмадхўжаев Абдулазизхон фахрли 1-ўринни қўлга киритди. Ўтказилган мусобақадаги ғолиблар дипломлар ва эсдалик совғалар билан тақдирландилар. Фахрли 1-ўрин соҳибига биринчи даражали диплом ва велосипед совға қилинди. Таълим муассасаси раҳбариятига мусобақани ташкиллаштиришда яқиндан ёрдам берганлиги учун ташаккурномалар топширилди.
“Кўкалдош” ўрта махсус
ислом таълим муассасаси матбуот хизмати
