Oʻzbekiston musulmonlari idorasi Taʼlim va ilmiy-tadqiqot boʻlimi tomonidan 2026–2027 oʻquv yili uchun oliy va oʻrta maxsus diniy taʼlim muassasalariga abituriyentlardan hujjatlarni qabul qilish jarayonlari 30-iyun sanasidan boshlanganligi eʼlon qilindi.
Shu munosabat bilan “Koʻkaldosh” oʻrta maxsus islom bilim yurtida ham 2026–2027 oʻquv yili uchun abituriyentlardan hujjatlarni qabul qilish jarayonlariga rasman start berildi.


Qabul jarayonlarini amaldagi meʼyoriy-huquqiy hujjatlar asosida, ochiqlik, shaffoflik va xolislik tamoyillari asosida tashkil etish maqsadida bilim yurti mudirining tegishli buyrugʻi bilan Qabul hayʼati tarkibi tasdiqlandi. Shuningdek, qabul jarayonlarini yuqori saviyada tashkil etish, hujjatlarni belgilangan tartibda qabul qilish va koʻrib chiqish, shuningdek, abituriyentlarga zarur maʼlumot hamda maslahatlar berish boʻyicha masʼul xodimlarning vazifalari belgilab olindi.


Abituriyentlar uchun qulay shart-sharoitlar yaratish maqsadida hujjatlarni qabul qilish maskani tayyorlandi, murojaatchilarni kutib olish, hujjatlarni rasmiylashtirish, ularga zarur maslahat va amaliy koʻmak koʻrsatish hamda qabul jarayonlarini tezkor va sifatli tashkil etish uchun masʼul xodimlar biriktirildi.
Qabul hayʼati tomonidan har bir murojaatni oʻz vaqtida koʻrib chiqish, hujjatlarni belgilangan tartibda rasmiylashtirish hamda qabul jarayonlarining adolatli, shaffof va xolis oʻtishini taʼminlash yuzasidan barcha zarur tashkiliy ishlar amalga oshirilmoqda.
Bilim yurtiga hujjatlar Oʻzbekiston musulmonlari idorasi tomonidan tasdiqlangan qabul tartibi va belgilangan muddatlar asosida qabul qilinadi. Abituriyentlar qabul jarayonlari, talab etiladigan hujjatlar hamda kirish imtihonlariga oid maʼlumotlarni bilim yurtining rasmiy axborot manbalari orqali muntazam kuzatib borishlari tavsiya etiladi.


«Koʻkaldosh» OʻMITM matbuot xizmati





