«Кўкалдош» ўрта махсус ислом таълим муассасасида 6 сентябрь куни Республикамиз мустақиллигининг 30 йиллигини муносиб нишонлаш ҳамда 2021-2022 ўқув йили бошланиши муносабати билан “Янги Ўзбекистонда эркин ва фаровон яшайлик!” шиори остида байрам тадбири бўлиб ўтди. Байрамона тадбирга Ўзбекистон мусулмонлари идораси раиси ўринбосари Ўткир Ҳасанбоев, таълим ва илмий тадқиқодлар бўлими мудири Салоҳиддин Шерхонов, Вазирлар маҳкамаси ҳузуридаги Дин ишлари бўйича қўмита таълим бўлими масъул ходими Нусратулло Нодиров, талабаларнинг ота-оналари ва фахрий устозлар таклиф этилди. Тадбирда билим юрти мударрислари, ишчи-ходимлар ва барча талабалар иштирок этдилар. Тадбир Республикамиз мадҳияси билан бошланди. Тадбирни таълим муассасаси мудири М.Насриев кириш қисми билан очиб берди. Барчани қўшалоқ байрам билан табриклади. Сўнгги йилларда диний-маърифий соҳада эришилган ютуқлар тўғрисида тўхталиб ўтди. Шундан сўнг Ўзбекистон мусулмонлари идораси раиси ўринбосари Ў.Ҳасанбоев ва Дин ишлари бўйича қўмита таълим бўлими масъул ходими Н.Нодиров ўз нутқларида мамлакатимиздаги сўнгги ислоҳотлар, барча дин вакилларига бир хил шароитлар яратилгани, аждодларимиз асарлари авлодларга етказиш учун кенг кўламда ишлар олиб бораётгани айтиб ўтилди. Диний соҳада, хусусан, диний таълим соҳасида эришилган ютуқлар бирма-бир тилга олинди. Тадбир давомида таълим муассасасида биринчи курсга қабул қилинган талабаларга панду-насиҳатлар қилинди. Мадрасада хизмат қилиб ўтган фахрий устозларни хотирлаб Қуръони карим тиловат қилинди ва уларнинг руҳи покларига бағишланиб дуолар қилинди.





Шундан сўнг барча талабалар “Мустақиллик дарси”ни ўтиш учун ўқув хоналарга киришди. Ушбу дарслар олдиндан тайёрланган слайдлар асосида билим юртининг барча курсларига ўтилди. Мамлакатимиз мустақилликни қўлга киритиши учун чеккан заҳматлар айтиб ўтилди. Истиқлолнинг илк даврларида вужудга келган қийинчиликларни матонат билан енгиб ўтган халқимиз аҳволи, уларнинг фаровон ҳаёт кечириши йўлидаги заҳматлари мисоллар билан слайдлар асосида ёритиб ўтилди. Истиқлол натижасида Ўзбекистон иқтисодий жиҳатдан барқарор давлат даражасига етгани ва дунёда ўз обрўсига эга бўлгани таъкидланди. Охирги йилларда юртимизда амалга оширилган ислоҳотларга алоҳида тўхтаб ўтилди. Диний-маърифий соҳадаги эришилган ютуқлар ҳақида маълумотлар берилди.





А.Ғаниев,
Маънавий ва маърифий масалалар бўйича мудир ўринбосари






