2025-yil 3-dekabr kuni “Nazarbek” talabalar turar joyida yoshlar tarbiyasi, maʼnaviy yetuklik va maʼrifiy dunyoqarashni yuksaltirishga qaratilgan navbatdagi davra suhbati boʻlib oʻtdi. Tadbir “Behuda ishlardan uzoq boʻlish” mavzusida oʻtkazilib, talaba-yoshlar orasida vaqtning qadriga yetish, maqsadli hayot kechirish, masʼuliyatni his etish va oʻz-oʻzini tarbiyalash masalalariga katta eʼtibor qaratildi.
Uchrashuvni Koʻkaldosh oʻrta maxsus Islom bilim yurti fiqh fani katta oʻqituvchisi, tajribali ustoz Jaloliddin domla Xolmoʻminov olib bordi. Suhbat davomida domla diniy manbalardan, fiqhiy qarashlardan, hadis va ibratli hikoyatlardan misollar keltirar ekan, yoshlarning fikrlash doirasini kengaytiruvchi, ularni toʻgʻri yoʻlga undovchi mulohazalarni bildirdi.



Ustoz oʻz soʻzida vaqtning beqiyos qadri haqida toʻxtalar ekan, shunday dedi:
“Talabaningning eng katta boyligi — uning vaqti. Vaqtni behuda oʻtkazish — boylikni shamolga sovurgandekdir. Kimki vaqtni qadrlasa, ilmda ham, kasbda ham, hayotda ham oʻz oʻrnini topadi.”
Shuningdek, Jaloliddin domla yoshlarning oʻrnak boʻla oladigan insonlarga ergashishi, foydali kitoblar oʻqishi, maʼnaviy tozalikni asrashi hamda har kuni oʻz oldiga kichik boʻlsa-da maqsad qoʻyish zarurligini taʼkidladi. U domlaning yana bir fikri talabalar ongida chuqur taassurot qoldirdi:
“Bugun qilinmagan yaxshi amal — ertaga afsusga sabab boʻladi. Shuning uchun har bir yosh har kuni bir yaxshi ish qilishga intilishi kerak.”
Tadbir davomida turar joy tarbiyachi-pedagogi Abdusattoriy Abdulloh, yotoqxona komendanti Gʻadayev Furqat hamda talabalar faol ishtirok etishdi. Ular mavzuga oid oʻz fikrlarini bildirib, ustozga qiziqarli savollar bilan murojaat qilishdi. Muloqot jarayoni ochiq va samimiy ruhda kechdi, talabalar bilan ustoz oʻrtasida oʻzaro fikr almashinuvi yanada jonlandi.
Uchrashuv nihoyasida talabalar Jaloliddin domlaga mazmunli va oʻgitlarga boy suhbat uchun minnatdorlik izhor etishdi. Tadbir yoshlarning maʼnaviy olamini boyitish, ularni foydali mashgʻulotlarga yoʻnaltirish hamda “Nazarbek” yotoqxonasida sogʻlom muhitni mustahkamlashda muhim ahamiyat kasb etdi.
📝Tarbiyachi-pedagog Abdusattoriy Abdulloh






