2021 йил 3 март куни Имом Мотуридий халқаро маркази томонидан “МОТУРИДИЙЛИК ВА САЛАФИЙЛИКДА ИМОН ТАЪРИФИ” мавзусида онлайн семинар ўтказилди. Семинарда ислом илмлари бўйича етакчи олим, ал-Азҳар университети Исломий даъват факультети Динлар ва мазҳаблар кафедраси ўқитувчиси Иброҳим Шуъайб Зайдон Ҳаммод маъруза қилди.
“Кўкалдош” ўрта махсус ислом таълим муассасаси устоз ва талабаларидан 90 нафар онлайн семинарда иштирок этиб, билимларини бойитдилар.
Иброҳим Шуъайб Зайдон Ҳаммод 1980 йилда Қоҳирада туғилган бўлиб, 2003 йилда “Ал-Азҳар” университети “Исломий даъват” факультетини, сўнг мазкур университетнинг “Динлар ва мазҳаблар” ихтисослиги бўйича магистратура босқичини тамомлаган. 2013 йилда “Ал-Азҳар” университетида докторлик диссертациясини ҳимоя қилган. Олим 2018-2020 йилларда Уммон Султонлиги Зуфор университетида имомлар ва воизлар учун ташкил этилган малака ошириш дастурларида иштирок этган. Иброҳим Шуъайб диншунослик, исломшунослик, калом, мазҳаблар тарихи, замонавий ислом билан боғлиқ бир қатор рисолалар ва илмий мақолалар муаллифидир. Бундан ташқари Жазоир, Иордания Ҳошимийлар Қироллиги каби давлатларда бир қатор маҳорат дарслари, конференцияларда илмий маърузалар билан қатнашиб келмоқда.
Семинарда ҳозирги кунда ақидавий ихтилофларнинг келиб чиқиш илдизларига аҳамият қаратиш лозимлиги таъкидланиб, бунинг учун диний атамалар, хусусан, иймон, ислом каби тушунчаларнинг аниқ таърифларини белгилаб олишга урғу берилди. Салаф ва халаф олимларнинг бу атамаларга берган таърифлари, таърифлардаги хилма-хиллик ва ҳар бирининг илмий асосларига атрофлича тўхталиб ўтилди. Мотуридийларнинг далиллари бирма-бир изоҳланди.
“Кўкалдош” ўрта махсус ислом таълим муассасаси матбуот хизмати
