«Koʻkaldosh» oʻrta maxsus islom bilim yurtida “Qurʼoni karim va tajvid” oʻquv kursi faoliyat yuritib kelmoqda. Hozirgi kungacha davlatimiz bergan bu imkoniyatdan unumli foydalangan holda, madrasa rahbariyati va albatta ustozlarining tinimsiz mehnat, hamda saʼy harakatlari bilan bu muassasadan minglab tinglovchilar Alloh taoloning ulugʻ Kalomini mukammal toʻgʻri oʻqishni oʻrganib chiqdilar.
Ana shunday tinglovchilardan yana bir qanchasi bugun, 3-fevral kunidan «Koʻkaldosh» oʻrta maxsus islom bilim yurtida «Qurʼoni karim va tajvid» oʻquv kursining navbatdagi 56-davra mashgʻulotlarini boshlashdi.
Yigʻilishda “Koʻkaldosh” oʻrta-maxsus islom bilim yurti «Yoshlar bilan ishlash, maʼnaviyat va maʼrifat boʻlimi» boshligʻi Abdulvosi Gʻaniyev, Matbuot kotibi Rustam Oxunjonov, “Qurʼoni karim va tajvid” oʻquv kursi uslubchisi Nuriddin Sharipov, “Qurʼoni karim va tajvid” oʻquv kursi ustozi Botir Balbekovlar qatnashdilar.






“Koʻkaldosh” oʻrta-maxsus islom bilim yurti «Yoshlar bilan ishlash, maʼnaviyat va maʼrifat boʻlimi» boshligʻi A.Gʻaniyev oʻquv kursining tinglovchilariga «Ilm va uning odoblari» mavzusida maʼruza qilib, ularga haqiqiy ilm egasi qanday odoblarga ega boʻlishi lozimligi haqida zarur maʼlumotlar yetkazdi.
Undan keyin A.Gʻaniyev oʻz maʼruzasi davomida noqonuniy diniy taʼlim olish va berishning qonun tomonidan taqiqlanganligi va qanday oqibatlarga olib kelishi, bugungi kunda Oʻzbekistonda davlat va din munosabatlari, diniy islohotlarning jadal surʼatlarda rivojlanayotgani va boshqa masalalarga alohida toʻxtalib oʻtdi.
Undan tashqari A. Gʻaniev oʻquv kursi tinglovchilarining tartib — intizomga rioya qilishlari, oʻz vaqtida darsga kelishlari, belgilangan darslarga muntazam ishtirok etishlari va boshqa intizomga oid tavsiyalarni aytib oʻtdi.
Yigʻilish yakunida «Qurʼoni karim va tajvid» oʻquv kursining navbatdagi bosqich tinglovchilari haqqiga duoyi-xayrlar qilindi.
N. Sharipov
«Koʻkaldosh» OʻMIBY «Qurʼoni karim va tajvid» oʻquv kursi uslubchisi






