2026-yil 2-iyul kuni Toshkent shahridagi “Shayx Muhammad Sodiq Muhammad Yusuf” jome masjidining majlislar zalida Oʻzbekiston musulmonlari idorasi Toshkent shahar vakilligi tashabbusi bilan “Islom giyohvandlikka qarshi” mavzusida ilmiy-amaliy seminar boʻlib oʻtdi.
Mazkur tadbir jamiyatda sogʻlom turmush tarzini qaror toptirish, yoshlarni giyohvandlik va boshqa turli zararli illatlardan asrash, diniy-maʼrifiy targʻibot ishlari samaradorligini yanada oshirish hamda bu boradagi hamkorlikni mustahkamlash maqsadida tashkil etildi.



Seminarda diniy-maʼrifiy soha vakillari, davlat va jamoat tashkilotlari mutasaddilari, Toshkent shahridagi tuman bosh imom-xatiblari, otinoyilar hamda sohaga daxldor masʼullar ishtirok etdilar.
Tadbir Qurʼoni karim tilovati bilan boshlandi. Shundan soʻng yigʻilishni Toshkent shahar bosh imom-xatibi, yigʻilish raisi Abduqahhor domla Yunusov ochib berib, bugungi kunda giyohvandlikning jamiyat maʼnaviyati va yoshlar tarbiyasiga salbiy taʼsiri, mazkur illatning oldini olishda diniy-maʼrifiy faoliyatning oʻrni hamda imom-xatiblar zimmasidagi muhim vazifalar haqida atroflicha toʻxtalib oʻtdi.

Seminar davomida Din ishlari boʻyicha qoʻmita boʻlim boshligʻi Muhiddin Hakimov, Toshkent shahar hokimining jamoat va diniy tashkilotlar bilan aloqalar boʻyicha oʻrinbosari – kotibiyat mudiri Abdumannon Karimov hamda “Koʻkaldosh” oʻrta maxsus islom bilim yurti rahbari Maʼmurjon domla Erkayev soʻzga chiqib, giyohvandlikka qarshi kurashishda davlat va diniy tashkilotlar oʻrtasidagi hamkorlikni yanada kuchaytirish, aholi, ayniqsa yoshlar oʻrtasida profilaktik va maʼrifiy tadbirlarni tizimli ravishda tashkil etish, sogʻlom turmush tarzini hamda milliy va diniy qadriyatlarni keng targʻib qilish yuzasidan oʻz fikr-mulohazalari va amaliy tavsiyalarini bildirdilar.
Taʼkidlanganidek, giyohvandlik nafaqat inson salomatligi, balki oila barqarorligi, jamiyat tinchligi va mamlakat taraqqiyotiga jiddiy tahdid soluvchi illatlardan biri hisoblanadi. Shu bois mazkur illatga qarshi kurashishda barcha masʼul tashkilotlar, taʼlim muassasalari, imom-xatiblar va keng jamoatchilikning hamjihatlikdagi saʼy-harakatlari muhim ahamiyat kasb etadi.
Seminar yakunida ishtirokchilar tomonidan sohadagi targʻibot ishlarini yanada takomillashtirish, yoshlarni turli yot illatlardan muhofaza qilish, ularning maʼnaviy immunitetini mustahkamlash hamda diniy-maʼrifiy faoliyat samaradorligini oshirishga qaratilgan ustuvor vazifalar belgilab olindi.

«Koʻkaldosh» OʻMIBY Matbuot xizmati





