Imom al-Margʻinoniy «Hidoya» kitobida: “Kishi duosida: “falonchining haqqi ila, yoki Nabiylar va Rosullaring haqqi ila” deyishi makruhdir, chunki Xoliq zot zimmasida biror maxluqotning vojib boʻlgan haqqi yoʻqdir”, deb aytganlar.
Alloma al-Muvsiliy “Al-ixtiyor» kitobida aytdilar: «Allohga oʻzganing nomi ila duo qilish makruh boʻladi, biron kishi: “Men sendan falonchi nomi ila yoki farishtalar nomi bilan yo paygʻambarlaring ismi bilan hamda shunga oʻxshash narsalar orqali soʻrayman», demasin. chunki Xoliq zot zimmasida biror maxluqotning vojib boʻlgan haqqi yoʻqdir”
Alloma al-Haskafiy aytdilar: “Biror kishi uchun faqat Allohning nomi ila va duo qilishda izn berilgan va buyurilgan shakllar bilangina duo qilishi durust boʻladi. Asos Alloh taoloning ushbu soʻzidir: “Allohning goʻzal ismlari bordir. Bas, Uni oʻsha ismlar bilan ila yod eting”.
Alloma Ibn Obidin al-Haskafiyning “faqatgina u bilan” soʻzlarini bayon qilib aytdilar: “yaʼni uni zoti, sifatlari, ismlari bilan”. (Roddul muxtor).
Ushbu dalillar tavassulni joiz ekanligini man qilmaydi, chunki bu manbalarda uning joiz ekanligiga ijmo qilingandir. Bu oʻrinda ulamolar man qilgan narsa: “Alloh taologa joiz boʻlmaydigan va Alloh taoloning zimmasiga haq sobit qilishni hayolga keltiradigan soʻzlardir”.
Zamonamizdagi hashaviy toifasidan boʻlgan ahli bidʼatlarning yuqoridagi manbalarni tavassulni joiz emasligiga dalil qilib olishlari borasidagi soʻzlari eʼtiborga olinmaydi.
Shayx Nizol Oli Roshi
Koʻkaldosh oʻrta maxsus islom taʼlim muassasasining oʻquv ishlari boʻyicha mudir oʻrinbosari N.Jalolov tarjimasi






