Qurʼoni karim va tajvid kursining 73-davrasi yakunlandi
Koʻkaldosh oʻrta maxsus islom taʼlim muassasasi huzuridagi “Qurʼoni karim va tajvid” kursining 73-davra tinglovchilari oʻqishni muvaffaqiyatli yakunladi. Shu munosabat bilan tashkil etilgan tantanali tadbirda taʼlim muassasasi direktori M.Erkayev hamda kurs oʻqituvchisi B.Bolbekov ishtirok etdi.
Tadbirda soʻzga chiqqan muassasa direktori M.Erkayev tinglovchilarni kursni tamomlaganlari bilan chin qalbdan muborakbod etdi. U Qurʼoni karimni oʻrganish va uni toʻgʻri tilovat qilish har bir moʼmin uchun ulugʻ saodat ekanini taʼkidlab, Paygʻambarimiz sollallohu alayhi va sallamning muborak hadislarini eslatib oʻtdi: “Sizlarning eng yaxshingiz Qurʼonni oʻrgangan va uni oʻrgatganingizdir”. (Imom Buxoriy rivoyati)
Direktor soʻzida bugungi kunda muhtaram Yurtboshimiz tashabbuslari bilan diniy-maʼrifiy sohaga qaratilayotgan katta eʼtibor hamda Muftiy hazratlari rahnamoligida yaratib berilayotgan keng imkoniyatlar tufayli yurtimizda Qurʼon ilmini oʻrganishni istagan har bir kishi uchun munosib sharoitlar mavjudligini alohida qayd etdi.
Shuningdek, u tinglovchilarni: u neʼmatning qadriga yetishga; oʻrgangan ilmlarini doimiy takrorlab borishga; Qurʼon axloqini hayotlariga tatbiq etishga; oila va farzandlariga ham ushbu ilmni yetkazishga; yurtimiz tinchligi va farovonligi yoʻlida fidoyi boʻlishga chaqirdi.
Kurs oʻqituvchisi B.Bolbekov esa davra davomida amalga oshirilgan ishlar haqida soʻzlab, tinglovchilarning izlanishi va sabr-toqatini eʼtirof etdi. U tajvid qoidalarini mustahkamlash uchun kundalik tilovatni tark etmaslik zarurligini taʼkidlab, tinglovchilarga foydali nasihatlar berdi.
Alloh taolo barchamizni Qurʼon ahlidan qilsin, oʻrgangan ilmimizni oʻzimizga, oilamizga va yurtimizga manfaatli qilsin. Omin!
«Koʻkaldosh» oʻrta maxsus islom taʼlim muassasasi Matbuot xizmati