Koʻkaldosh oʻrta maxsus islom taʼlim muassasasida 4-kurs talabalari bilan odob-axloq masalalariga bagʻishlangan maʼnaviy-maʼrifiy suhbat oʻtkazildi.



Mazkur uchrashuvda taʼlim muassasasi mudiri, PhD Maʼmurjon Erkayev, oʻquv ishlari boʻyicha mudir oʻrinbosari Djalolov Nodir domla hamda Oʻquv-uslubiy boʻlim boshligʻi Farhod Asatullayev ishtirok etdilar.
Suhbat davomida talabalarning shaxsiy fazilatlari, ichki madaniyati va kelajakdagi kasbiy faoliyatida odob-axloqning tutgan oʻrni atroflicha muhokama qilindi. Taʼlim muassasasi rahbariyati 4-kurs talabalari bilan ochiq muloqot olib borib, ularning fikr va mulohazalarini tingladi.



Uchrashuv jarayonida quyidagi masalalarga alohida eʼtibor qaratildi:
🔹darslarga oʻz vaqtida qatnashish;
🔹taʼlim muassasasi ichki tartib-qoidalariga qatʼiy rioya qilish;
🔹muomala madaniyatiga amal qilish;
🔹jamoat joylarida oʻzini tutish odobi;
🔹ilm olishda ixlos va masʼuliyatni kuchaytirish.
Muassasa mudiri tomonidan talabalarga kelgusida diniy-maʼrifiy sohada faoliyat olib borishda yuqori axloqiy fazilatlar asosiy mezon boʻlishi taʼkidlandi. Shuningdek, bitiruvchi kurs talabalari jamiyat oldida masʼuliyatli, namunali va yetuk shaxs boʻlib shakllanishi zarurligi qayd etildi.
Suhbat yakunida talabalarga oʻz ustida muntazam ishlash, odob-axloq masalalarida yanada eʼtiborli boʻlish hamda taʼlim muassasasining shaʼniga munosib boʻlish borasida tavsiyalar berildi.
Mazkur uchrashuv 4-kurs talabalarining maʼnaviy-axloqiy kamolotini mustahkamlash, ularda yetuklik va masʼuliyat tuygʻusini yanada kuchaytirishga qaratilgan muhim tadbirlardan biri boʻldi.
«Koʻkaldosh» OʻMIBY Oʻquv-uslubiy boʻlimi






