“Koʻkaldosh” oʻrta maxsus islom bilim yurti mudiri, islomshunoslik fanlari boʻyicha falsafa doktori (PhD) Maʼmurjon domla Erkayev tomonidan bilim yurti ikkinchi kurs talabalari bilan ochiq suhbat tashkil etildi. Tadbirda oʻquv ishlari boʻyicha mudir oʻrinbosari N. Jalolov, guruh rahbarlari, xodimlar hamda ikkinchi kurs talabalari ishtirok etdilar.


Uchrashuvning asosiy maqsadi talabalar bilan oʻtgan oʻquv yilidagi fanlar kesimidagi oʻqish natijalarini tahlil qilish, ularning yutuq va kamchiliklarini muhokama etish, shuningdek, joriy oʻquv yilida kutilayotgan natijalar yuzasidan rejalar belgilashdan iborat boʻldi.


Suhbat davomida mudir Maʼmurjon domla Erkayev talabalarga ilm yoʻlida tirishqoqlik, vaqtni toʻgʻri taqsimlash, sabr va intizom bilan harakat qilish zarurligini taʼkidladi. Shuningdek, har bir talaba oʻz oldiga aniq maqsad qoʻyib, oʻqishdagi masʼuliyatni yanada oshirishi, darslarda faol ishtirok etishi lozimligi haqida soʻz yuritildi.
Tadbirda talabalar oʻz fikr-mulohazalari bilan faol qatnashdilar. Suhbat samimiy muhitda, ochiq muloqot shaklida oʻtdi.


Tadbir yakunida yurtimiz istiqboli, xalqimiz ravnaqi va millatimiz maʼnaviy yuksalishiga munosib hissa qoʻshadigan, ilmli va yetuk kadrlar boʻlib yetishishlari haqida ezgu tilaklar bildirildi hamda talabalar uchun xayr-duolar qilindi.
SaidAzimxon Saidakramov
Koʻkaldosh oʻrta maxsus islom bilim yurti oʻqituvchisi





