“Кўкалдош” ўрта махсус ислом билим юртида талабаларнинг касбий маҳорати бўйича билим ва кўникмаларини ошириш, муомала маданияти ва ўз касбига бўлган масъулиятини янада ошириш мақсадида уламолар ва тажрибали имом-хатиблар билан учрашув ва давра суҳбатлари ташкил этиш бўйича режа ишлаб чиқилган. Мазкур режага мувофиқ 30 октябр куни билим юртида мударрислар, ишчи-ходимлар ва талабалар иштирокида “Илм дунёда иззат, охиратда шарафдир” мавзусида давра суҳбати ташкил этилди. Давра суҳбатига Тошкент шаҳар Шайхонтоҳур тумани “Фирдавс” жоме масжиди имом хатиби Бахтиёр домла Сатторов таклиф этилди. Устоз Бахтиёр домла Сатторов ўз сўзларини илмга оид ибратли ҳикматлари асосида бошлаб талабаларга илм олишда аввало одоб бўлиши лозимлигини таъкидлади. Ёшликда билим олиб, ғайрату шижоатга тўла пайтда бор имкониятни эзгуликка сафарбар этиш, инсон умрининг мазмун-моҳиятини белгилаб беришлиги, бу ҳақида буюк аждодларимиз меросида, жаҳон алломалари ижодида қайта-қайта уқтирилганлиги, бежиз ҳикматларда: “Ёшликда олинган илм тошга ўйилган нақш кабидир”, — дея айтилмайди, дея таъкидлаб ўтдилар. Йиллар залворидан омон қолган тошлар устидаги турли битиклар мудом ўз шаклини йўқотмагани каби ёшликда эгалланган илм ҳам кишига ҳамиша ҳамроҳ бўлади. Дарҳақиқат, илм олишга ёшликдан муҳаббат қўйиш, кишиларни келажакда етук шахс бўлиб камол топишига хизмат қилади. Аждодларимизнинг ҳаёт фаолиятлари ҳам биз учун сабоқдир, дедилар. Шунингдек, Б.Сатторов Қуръони Карим оятлари ва муборак ҳадиси шарифлардан мисоллар келтириб мавзуни тушунтириб ўтдилар.
Давра суҳбати якунида, ҳар бир миллатнинг истиқболи маълум маънода билимдон ва маърифатли ёшлар қўлида эканлиги, илм-маърифатга, таълим-тарбияга эътибори юксак бўлган халқ фарзандлари эса маънан пок, руҳан соғлом бўлиб етишишларини таъкидладилар. Давра суҳбати сўнггида талабалар ўзларини қизиқтирган саволларини бердилар ва ташриф буюрган меҳмон саволларга етарлича жавоб бердилар.
“Кўкалдош” ўрта махсус ислом
билим юрти Матбуот хизмати
