


Муқаддас динимизнинг асл моҳиятини, эзгулик, инсонпарварлик дини экани, маънавиятга, илмга ундашини ёш авлодга етказиш, динимиз таълимотларини ўрганиш ва таҳлил қилишга чорлаш, маърифат ва ватанпарварлик ғояларини кенг тарғиб этиш мақсадида шу кунларда юртимизда бўлиб ўтаётган “Бағрикенглик ҳафтаси” муносабати билан Кўкалдош ўрта махсус ислом билим юртида Ўзбекистонда Шанхай ҳамкорлик ташкилоти Халқ дипломатияси маркази билан ҳамкорликда ташкил этилган “Ислом – тинчлик ва эзгулик дини” мақолалар танлови бўлиб ўтди.



Шу муносабат билан бугун, 14 ноябрь куни Кўкалдош ўрта махсус ислом билим юртида “Ислом – тинчлик ва эзгулик дини” мақолалар танловининг тақдирлаш маросими бўлиб ўтди.
Тадбирда Кўкалдош билим юрти мудири Маъмуржон Эркаев, Ўзбекистонда Шанхай ҳамкорлик ташкилоти Халқ дипломатияси маркази директори Қобилжон Собиров, билим юрти Ёшлар билан ишлаш, маънавият ва маърифат бўлими бошлиғи Абдувоси Ғаниев, Устоз Ислом Муҳаммад ҳамда билим юрти мударрис ва талабалари қатнашишди.



Тадбирга сўзга чиққан билим юрти мудири Маъмуржон Эркаев, Ўзбекистонда Шанхай ҳамкорлик ташкилоти Халқ дипломатияси маркази директори Қобилжон Собиров ва билим юрти Ёшлар билан ишлаш, маънавият ва маърифат бўлими бошлиғи Абдувоси Ғаниев ушбу мақолалар танловининг аҳамияти, унинг долзарблиги ҳамда истиқболдаги билим юрти ва Ўзбекистонда Шанхай ҳамкорлик ташкилоти Халқ дипломатияси маркази ўртасидаги ҳамкорлик режаларига катта омил бўлиб хизмат қилишини таъкидлаб ўтдилар.





Устоз Ислом Муҳаммад сўзга чиқиб “Хаттотли санъати” келиб чиқиш тарихи ва унинг ҳозирги кундаги аҳамияти ҳақида тадбирга йиғилганларга сўзлаб бердилар.
Тадбирнинг асосий қисмида танловда иштирок этган талабаларнинг тақдирлаш маросими бўлиб ўтди. Мақолалар танловида фахрли 1-ўринни 101-гуруҳ талабаси Абдумаликов Раҳматуллоҳ «Ислом динида бағрикенглик тамойиллари» мақоласи билан, 2-ўринни 301-гуруҳ талабаси Ниёзалиев Асадуллоҳ «Ислом- инсоний қадриятлар ва меҳр-муҳаббат дини» мақоласи билан ва 3-ўринни 401-гуруҳ талабаси Муҳаммаджонов Улуғбек «Бағрикенглик- тотувлик асоси» мақоласи билан қатнашиб, қўлга киритишди. “Энг креатив мақола” номинациясини 402-гуруҳ талабаси Исмоилов МуҳаммадАмин «Ислом бағрикенглик ва тинчлик дини» номли мақоласи билан қўлга киритган бўлса, “Энг намунали мақола” номинациясида 401-гуруҳ талабаси Абдурасулов Элдорбек ўзининг «Исломда бағрикенгликка эътибор» номли мақоласи билан ғолиб бўлди.





Танлов ғолиблари Шанхай ҳамкорлик ташкилоти Халқ дипломатияси маркази томонидан тайёрланган эсдалик совғалари ҳамда “Диплом”лар берилди.



Ундан ташқари Устоз Ислом Муҳаммад ва билим юрти ўқитувчиси Хуршид Бойхўрозов танлов иштирокчиларини тақдирлаш маросимини ташкил этишда жонбозлик кўрсатганлари учун “Ташаккурнома” ҳамда эсдалик совғалар билан тақдирландилар.



Тадбирнинг сўнгги қисмида Устоз Ислом Муҳаммад томонидан ташкил қилинган “Хаттотлик кўргазмаси ва маҳорат дарслари” бўлиб ўтди.
«Кўкалдош» ЎМИБЮ Матбуот хизмати






