Бугун, 18 январь куни “Кўкалдош” ўрта махсус ислом билим юртида 2023 йилда амалга оширилган ишлар юзасидан “Сарҳисоб-2023” номли тадбир бўлиб ўтди. Тадбир Қуръони карим тиловати билан бошланди. Билим юрти “Қўръони карим ва тажвид” бўлими бошлиғи Аваз қори Давлетов тиловатидан сўнг тадбирни очиб бериш учун дуо ва кириш сўзи билим юрти мудири Академик Абдулҳаким қори Матқуловга берилди.



Абдулҳаким қори Матқулов ўткан 2023-йилда қилинган ишлар, режадаги мақсадга қанчалик эришилгани ва бошланган 2024-йилда билим юрти олдидаги вазифалар, қилиниши лозим бўлган ишлар ва уларнинг самарали бўлиши учун нималарга эътиборли бўлиш кераклиги ҳақида гапирдилар.



Шундан кейин минбарга билим юртининг катта устозларидан бири Жалолиддин домла Холмўминов таклиф қилинди. Жалолиддин домла 2023-йилда ўқитувчилар ва талабалар томонидан эришилган натижалар, улар томонидан таржима қилиниб, нашр қилинган асарлар ҳақида сўзлаб бердилар. Жумладан: билим юрти мудири томонидан нашрга тайёрланган “Намоз. Ибодат арконлари”, “Тажвид. Қуръон ўқиш қоидалари”, “Қўръони карим ва тажвид” бўлими бошлиғи Аваз қори Давлетов томонидан нашрга тайёрланган “Болажонлар учун арабча ҳарфларни расмалар орқали танитиш ва ўргатиш бўйича осон қўлланма” ва билим юрти мударрислари Жалолиддин домла Холмўминов, Қудратуллоҳ Сидиқметов ва Шокиржон Мадаминов томонидан таржима қилиниб нашрдан чиққан “Ислом одоблари энциклопедияси” ҳамда “Мишкот ал-Масобиҳ шарҳи” китоблари ҳақида йиғилганларга баён қилиб бердилар.



Сўнг ўтган йилдаги амалга оширилган ташаббусларни акс этирувчи статистика ўқиб берилди. Ўқиб эшиттирилган статистик маълумотлар мадраса устозлари ва ходимлари томонидан қилинган машаққатли меҳнат ва салмоқли натидаларни ўзи мужассам этган десак муболаға қилмаган бўламиз.



Тадбир маънавият ва маърифат ишлар бўлими бошлиғи Абдулвосе домла Ғаниевнинг нутқи билан давом этди. Абдулвосе домла 2023 йилда амалга оширилган ишлар ҳақида сўзлаб, барча устоз ва ходимларга эришилган муваффақиятли натижалар ҳамда кўрсатилган фидойиликлар учун ўз ташаккурларини изҳор қилдилар.


Тадбир иккинчи қисмида ярим аср ёки ундан ортиқ умр кўриб, ана шу умрининг асосий қисмини дин йўлида, мадраса ҳизматида фидо қилган бир қанча устоз ва ходимларни ҳам қилган меҳнатлари учун тақдирлаш маросими ўтказилди. Улар билим юрти раҳбарияти томонидан “Табрикнома”, эсдалик совға ва пул мукофоти билан тақдирландилар. Ундан ташқари ўзларининг фидокорона хизмати билан кўзга кўринган ўқитувчи-ходимлар мақтов ёрлиқлари ва эсдалик совғалар билан тақдирландилар.



Тадбирнинг якунида барча ушбу тадбир учун ҳозирланган зиёфат дастурхонига таклиф қилинди.
«Кўкалдош» ЎМИБЮ Матбуот хизмати





