Islom va imon Abu Hanifa, Abu Yusuf, Imom Muhammad va qolgan muhaqqiq ulamolarimizning nazdida bir narsadir. Chunki imon bu Alloh taoloning rububiyatini va Alloh taolo har bir narsani yaratuvchisi va tarbiyakunandasi ekanini tasdiqlash. Musulmon kishi barcha narsalarni Allohgagina boʻyinsunuvchi deb biladi. Bunga dalil: “Aytingiz (ey moʼminlar), Allohga va bizga nozil qilingan kitobga va Ibrohim, Ismoil, Isʼhoq, Yaʼqubga va oʻsha urugʻ-avlodga nozil qilingan narsalarga, Muso va Iysoga berilgan narsalarga va barcha paygʻambarlarga Parvardigorlari tarafidan berilgan narsalarga ishondik. Biz ulardan birortasini ajratib qoʻymaymiz va biz U zotga (Alloh taologa) boʻyinsunuvchilarmiz.” (Baqara surasi 136-oyat) Musulmonlar Alloh taologa U zot ularga imon keltirish kerak boʻlgan narsalarning barchasida islomni qoim qilishdi. “Bas, Biz u joydagi moʼminlardan boʻlgan kishilarni chiqarib yubordik.(Lekin) u joyda bir xonadondan (yaʼni, Lut paygʻambar xonadonidan) oʻzga musulmonlarni topmadik.” (Zoriyot surasi 35-36 oyatlar) Ushbu oyatda imon bilan taʼbir qilingan narsaga islom kalimasi ishlatildi, musulmonlar deb nomlangan zotlarni moʼminlar deb nomlandi. Demak, islom va imon haqiqatda bir narsa ekani maʼlum boʻladi.
Rustam OXUNJONOV tarjimasi
Koʻkaldosh oʻrta maxsus islom taʼlim muassasasi matbuot kotibi





