“Кўкалдош” ўрта махсус ислом таълим муассасасида талабаларнинг касбий маҳорати бўйича билим ва кўникмаларини ошириш, муомала маданияти ва ўз касбига бўлган масъулиятини янада ошириш мақсадида уламолар ва тажрибали имом-хатиблар билан учрашув ва давра суҳбатлари ташкил этиш бўйича режа ишлаб чиқилган. Феврал ойи Хатоба фани ойлиги муносабати билан ва мазкур режага мувофиқ 26 феврал куни билим юртида мударрислар, ишчи-ходимлар ва талабалар иштирокида давра суҳбати ташкил этилди. Давра суҳбатига Тошкент шаҳар “Сирожи Солиҳ” жоме масжиди имом хатиби, Тошкент ислом институти ўқитувчиси Хасан домла Қодиров таклиф этилди. Тадбирни маънавий-маърифий масалалар бўйича мудир ўринбосари А.Ғаниев олиб борди. Кириш қисмида мавзу юзасидан ўз фикр мулоҳазаларини билдирди ва таклиф этилган меҳмонни таништирди ва сўз навбатини берди.
Устоз Хасан домла ўз маърузаларида талабаларга илм олишда аввало ният тўғри бўлишлиги ва талабада одоб бўлиши лозимлигини таъкидлади. Ёшликда билим олиб, ғайрату шижоатга тўла пайтда бор имкониятни эзгуликка сафарбар этиш, инсон умрининг мазмун-моҳиятини белгилаб беришлиги, бу ҳақида буюк аждодларимиз меросида, жаҳон алломалари ижодида қайта-қайта уқтирилгани айтилди.
Шунингдек, маърузачи ўз нутқида юртимиздан етишиб чиққан етук алломаларимизнинг ибратли ҳаёт-фаолиятларидан мисоллар келтирди ва намуна ўрнак сифатида ўзларининг ёшликдан илм олганликлари, устозлари, шу кунгача бўлган фаолиятларини талабаларга сўзлаб бердилар.
Давра суҳбати якунида, ҳар бир миллатнинг истиқболи маълум маънода билимдон ва маърифатли ёшлар қўлида эканлиги, илм-маърифатга, таълим-тарбияга эътибори юксак бўлган халқ фарзандлари эса маънан пок, руҳан соғлом бўлиб етишишларини таъкидладилар. Давра суҳбати сўнггида талабалар ўзларини қизиқтирган саволларини бердилар ва ташриф буюрган меҳмон саволларга етарлича жавоб бердилар.
«Кўкалдош» ўрта махсус ислом таълим муассасаси матбуот хизмати
