Hikoyalarda aks etgan “qirq hadis”.
Farzandlarimiz uchun…
5-hadis
Kunlardan bir kuni bosh vazir bir necha aʼyonlari bilan bozor rastalarini aylangani chiqdi. Aylanib yurish asnosida u qul bozoriga ham kirib koʻrishni xohlab qoldi. Bu bozorda ozodligidan mahrum boʻlgan bechora qullar sotilar edi. Vazir qullarni yaxshilab koʻzdan kechirish uchun ularga yaqinroq joyga bordi. Shunda yoshi ulugʻ qullardan biri unga qarata: “Xojam, sallangizda dogʻ bor ekan”, – dedi. Vazir sallasini yechib qoʻliga oldi. Keksa qul hak ekan. Chindan ham vazirning sallasida dogʻ bor edi. Demak vazir kun davomida shu dogʻ bilan yurgan ekanu, yonidagilarning birortasi buni aytmabdi. Vazir bundan qattiq gʻazablandi. Soʻngra atrofidagi aʼyonlariga: “Sizlar shuncha vaqt men bilan birga boʻlsangiz ham shu holatda yurishimga koʻz yumdingizmi? Sallamdagi dogʻni koʻra turib sukut saqladingizmi?!”- dedi ranjigan holatda. Va yana gapida davom etib: “Oddiygina bir qul men uchun haqiqiy doʻst boʻlib chiqishini tasavvur ham qilmagandim. Endi esa doʻstim qul boʻlishiga aslo rozi boʻlmayman, darhol uni sotib olinglar va ozod qilinglar!” – dedi. Soʻngra vazir bu voqea insonlarni yodida saqlanib qolishi uchun katta bir qogʻozga Rosululloh sollallohu alayhi va sallamning: “Moʼmin moʼminning oynasidir”, degan hadislarini yozishga va uni jamoat joylariga oʻrnatib qoʻyishga buyurdi.
Chindan ham Rosululloh sollallohu alayhi va sallamning ushbu hadislariga amal qilish moʼminlar uchun naqadar foydali!
(المؤمن مرآة المؤمن)
“Moʼmin moʼminning koʻzgusidir”.
Oxunjon AHMEDOV tarjimasi
«Koʻkaldosh» OʻMIBY mudarrisi




