Бугун, 19 декабрь куни “Кўкалдош” ўрта махсус ислом билим юртида Муфтий шайх Нуриддин Холиқназар ҳазратларининг нашр этилган китоблари ҳамда “Нурул яқин” асарининг академик таржимаси тақдимоти бўлиб ўтди.
Тадбирга Тошкент ислом институти катта ўқитувчилари — сийрат фани устози Абдулазим домла Зиёуддин ҳамда Баҳодир домла Аъзамов ташриф буюрди.
Тадбирни билим юрти мудири, исломшунослик фанлари бўйича фалсафа доктори (PhD) Маъмуржон домла Эркаев очиб бериб, бугунги кунда сийрат ва ислом тарихи фанларининг долзарб аҳамияти, ҳар мусулмон ислом тарихидан озми-кўпми билимга эга бўлиши зарурлиги, бу борада эса “Нурул яқин” китоби кўп йиллардан буён халқимизнинг ислом тарихини ўрганишида муҳим аҳамият касб этиб келаётганини таъкидлади. Шунингдек, Муфтий шайх Нуриддин Холиқназар ҳазратларининг нашр этилган китоблари, хусусан “Эй бандаларим” (бир қудсий ҳадис шарҳи) асарининг илмий ва тарбиявий аҳамиятига алоҳида тўхталиб ўтди.



Шундан сўнг, Абдулазим домла Зиёуддин энг аввало Муфтий шайх Нуриддин Холиқназар ҳазратларининг нашр этилган китоблари, хусусан “Эй бандаларим” (бир қудсий ҳадис шарҳи) асарининг илмий ва тарбиявий аҳамиятига алоҳида тўхталиб ўтди. “Нурул яқин” асарининг муаллифи ҳамда ушбу китобнинг сийрат фани манбалари орасида тутган ўрни ҳақида маълумот берди. Ўз тадқиқотларига кўра, мазкур асар “Сийратул Ҳалабия” китобидан қисқартирилган ҳолда тайёрлангани, изоҳлар ёзиш жараёнида ушбу манба ҳамда бошқа кўплаб сийрат асарларидан фойдаланилганини таъкидлади. «Нурул яқин» китоби илгари ҳам ўзбек тилига бир неча бор таржима қилинган бўлса-да, кўплаб толиби илмларнинг сўрови билан ушбу академик таржимага қўл урганини, таржима жараёни узоқ ва машаққатли меҳнат талаб этганини баён қилди. Шунингдек, Мадина даврига оид қисм устида олиб борилган саъй-ҳаракатлар, муҳаррир билан бўлган илмий муҳокамалар ва таржиманинг илмий савияси ҳақида ҳам маълумот берди. Муаллиф сўзи сўнгида талабаларга сийрат фанини ўрганишда эътибор қаратилиши лозим бўлган муҳим масалалар юзасидан қимматли маслаҳатлар берди.


Тадбир давомида Баҳодир домла Аъзамов сўзга чиқиб, “Нурул яқин” китобининг таржимасидаги ўзига хос жиҳатлар, асарда бошқа китобларда кам эътибор берилган масалаларга алоҳида урғу берилгани, китобдаги изоҳларнинг илмий жиҳатдан жуда қимматли экани, академик таржима юксак савияда амалга оширилганини қайд этди. Айниқса, талабалар илм ва малакаларини оширишда асл арабий матн билан ўзбекча таржимани солиштириб ўқишлари муҳим эканини таъкидлади.
Тадбир якунида устозлар ва талабалар томонидан берилган қизиқарли саволларга атрофлича жавоблар берилди. Ушбу маънавий-маърифий тадбир иштирокчилар учун жуда манфаатли ва мазмунли бўлди.


Тадбир меҳмонларига билим юрти томонидан миннатдорчилик сифатида ҳадялар тақдим этилди.
«Koʻkaldosh» OʻMIBY Matbuot xizmati






