Қуръони каримда рўзанинг ҳукми баён қилинган оятларнинг орасига рўзага алоқаси бўлмаган, балки дуога алоқадор, дуога тарғиб қилган ушбу оят кириб қолган:
(Эй, Муҳаммад!) Сиздан бандаларим Мен ҳақимда сўрасалар, (айтинг) Мен уларга яқинман. Менга илтижо қилувчининг дуосини ижобат қиламан. Улар ҳам Мени (даъватларимни) ижобат (қабул) қилиб, Менга иймон келтирсинлар, шояд (шунда) тўғри йўлни топсалар. (Бақара сураси, 186-оят)
Уламоларимиз бунинг ҳикматини баён қилиб: “Бу оят рўза пайтида қилинган дуоларнинг ижобат бўлишини англатади ҳамда Рамазон ойида бандани кўпроқ дуода бўлишга тарғиб қилади”, дейишган.
Ибн Можа раҳматуллоҳи алайҳ ривоят қилган ҳадисда: “Албатта рўзадор учун ифтор пайтида рад қилинмайдиган дуо бор”, дейилган.
Демак, рамазон кунлари, хусусан, ифтор пайтларида бошқа нарсага чалғимасдан, имкон қадар кўпроқ дуода бўлишимиз мақсадга мувофиқ бўлади.
Абдуллоҳ ибн Амр розияллоҳу анҳу ифтор қилсалар, қуйидагича дуо қилар эканлар:
“Аллоҳумма инний ас’алука бироҳматикаллатий васиъат кулла шай’ин ан тағфиро лий” яъни, “Аллоҳим, Сендан барча нарсани сиғдирган раҳматинг ила мени мағфират қилмоғингни сўрайман!”.
Баъзи солиҳлар ҳали рамазон келмасдан олдин “Рамазон келса, Аллоҳдан фалон-фалон нарсаларни сўраб оламан”, деб Рамазон ойини интиқиб кутишар экан.
Албатта бизнинг ҳам Роббимиздан сўрайдиган дуоларимиз кўп. Шунинг учун Рамазон ойида ғафлатда қолмай, Аллоҳдан сўраб олайлик!
Қудратуллоҳ Сидиқметов
