Ramazon hayiti va Navroʻz — bahor ayyomi arafasida yurtimiz boʻylab obodonlashtirish ishlari keng koʻlamda olib borilmoqda. Shu munosabat bilan 14–15 mart kunlari mamlakatimizning barcha hududlarida “Yurt obodligi, avvalo, mahalladan boshlanadi!” shiori ostida umumxalq xayriya hashari tashkil etildi.



Mazkur xayrli tadbir doirasida “Koʻkaldosh” oʻrta maxsus islom bilim yurtida ham obodonlashtirish va tozalash ishlari amalga oshirildi. Hasharda bilim yurti rahbariyati, ustozlar, xodimlar hamda talabalar faol ishtirok etib, taʼlim muassasasi hududini yanada obod va fayzli qilishga oʻz hissalarini qoʻshdilar.






Hashar davomida bilim yurti hovlisi va atrof-muhitini tozalash, daraxtlar va yashil hududlarni tartibga keltirish, gul koʻchatlari ekish hamda obodonlashtirish ishlari bajarildi. Shuningdek, binolar atrofi va ichki hududlarda tartib-intizomni mustahkamlashga qaratilgan ishlar olib borildi.






Bunday xayrli tadbirlar nafaqat hududlarni obodonlashtirish, balki jamoa aʼzolari oʻrtasida hamjihatlik va birdamlik muhitini mustahkamlashga xizmat qilmoqda. Hasharda ishtirok etgan barcha ustoz va talabalar yurt ravnaqi, mahalla obodligi yoʻlida oʻz hissalarini qoʻshayotganliklarini alohida taʼkidladilar.


Mazkur umumxalq xayriya hashari bilim yurti jamoasi tomonidan koʻtarinki kayfiyatda, uyushqoqlik va hamjihatlik ruhida oʻtkazildi.
Saidakramov Saidazimxon, Koʻkaldosh oʻrta maxsus islom bilim yurti Yoshlar bilan ishlash, maʼnaviyat va maʼrifat boʻlimi uslubchisi





