“Энг намунали хона” кўрик – танлови
14-февраль куни «Назарбек» талабалар турар жойида “Энг намунали хона” кўрик – танлови натижалари эълон қилинди.
Ушбу кўрик – танлов талабалар орасида тозалик ва поклик ҳамда истиқомат қилаётган хоналарини тартибли тутишни тарғиб қилишга қаратилган. Тадбир бошида тарбиячи Р.Ахунджанов исломда тозалик ва покизаликка катта эътибор берилишлиги, шу жумладан талабаларнинг кийинишда, ётоқхона ва синфхоналарни тозаликка риоя қилиш лозимлиги тўғрисида гапириб, мавзуга оид Қуръони карим оятлари, Пайғамбаримиз Муҳаммад соллолоҳу алайҳи ва салламнинг ҳадислари ва уламоларнинг ибратли сўзларини баён қилиб берди.
Энг шинам хона кўрик-танлови билим юртининг маънавий ва маърифий масалалари бўйича мудир муовини А.Ғаниев, тарбиячи Р.Ахунджанов ва навбатчи ўқитувчилари томонидан кундалик хоналарни кўздан кечириш (хона тозалиги, ўринларнинг тўғри тартибга солинганлиги, кийим жавонларда кийимларни тартиби ва бошқа қулайликлар эътиборга олинган) орқали амалга оширилди.
Натижага кўра биринчи ўринни 211- хона талабалари биринчи, 208 –хона талабалари иккинчи ва 209-хона талабалари учинчи ўринни эгаллашди. Уларга эсдалик совғалари топширилди.
Тадбир сўнгида тарбиячи Р.Ахунджанов талабаларга ўзлари истиқомат қилаётган хоналарни тоза ва саранжом тутишга, хоналардаги жиҳозларга эътиборли бўлиб, уларни асраб-авайлашга ҳамда ўзларига юклатилган кундалик навбатчилик вазифаларига масъулият билан ёндошишга тарғиб қилди.
Тарбиячи: Р.Ахунджанов
