Tadbir boshida yotoqxona komendanti F. Gadoyev soʻzga chiqib, yotoqxonada yongʻin xavfsizligini taʼminlash boʻyicha amalga oshirilayotgan ishlar, mavjud tartib-intizom hamda talabalar zimmasiga yuklatilgan masʼuliyat haqida oʻz fikrlarini bildirib oʻtdi. Shundan soʻng Toshkent viloyati Zangiota tumani Favqulodda vaziyatlar boʻlimining katta inspektori A. Toshboyev talabalarga keng qamrovli maʼruza oʻqib berdi.


Maʼruza davomida u yongʻin xavfini keltirib chiqarishi mumkin boʻlgan omillar va ularni oldini olish choralarini tushuntirdi, elektr jihozlaridan toʻgʻri va xavfsiz foydalanish qoidalariga alohida toʻxtaldi, yotoqxona va boshqa yopiq binolarda ochiq olovdan foydalanish qatʼiyan man etilishi sabablarini izohladi. Shuningdek, yongʻin sodir boʻlgan holatda binodan xavfsiz va tartibli ravishda evakuatsiya qilish bosqichlarini tushuntirib berdi. Inspektor oʻt oʻchirgichlardan toʻgʻri foydalanish boʻyicha amaliy koʻrsatmalarni ham berib, ularning har biri qanday holatlarda qoʻllanishi, ishga tushirish tartibi va xavfsizlik choralarini batafsil yoritdi. U, shuningdek, favqulodda vaziyat yuzaga kelganida masʼullarga va atrofdagilarga tezkor xabar berish tartibi, bu jarayonda talabalarning oʻzaro hamjihatligi va hushyorligi naqadar muhim ekanini taʼkidladi.


Amaliy mashgʻulot davomida inspektor talabalar bilan birgalikda oʻt oʻchirgichdan foydalanishning amaliy bosqichlarini koʻrsatib berdi. Talabalar oʻzlarini qiziqtirgan savollarga javob oldilar va yongʻin xavfsizligi boʻyicha bilimlarini mustahkamladilar.
Tadbir yakunida barcha talabalarga yongʻin xavfsizligi qoidalariga qatʼiy rioya qilish zarurligi yana bir bor taʼkidlandi.
Saidakramov Saidazimxon
“Koʻkaldosh” OʻMIBY Yoshlar bilan ishlash, maʼnaviyat va maʼrifat boʻlimi uslubchisi






