Bugun 11-may kuni Koʻkaldosh oʻrta maxsus taʼlim muassasasida peshin namozidan soʻng Qurʼoni karimni toʻliq yod olgan 3-kurs talabasi Norboyev Dilshodni madrasa rahbariyati tomonidan taqdirlash marosimi oʻtkazildi.


Tadbir Qurʼoni karimning xatmi-sagʻir qilish bilan boshlandi, xatmi-sagʻirdan soʻng taʼlim muassasasi mudiri Abdulhakim qori Matqulov Norboyev Dilshodni va uni Qurʼoni karimni toʻliq yod olishda taʼlim bergan ustozlari Avaz qori Jumaboyev va Begzod Xoldorov haqiga hamda yurt tinchligi, dinimiz, millatimiz ravnaqi yoʻlida xizmat qilib mutavaffo boʻlib ketgan barcha vatandoshlarimiz, hozirda ushbu yoʻlda say-harakat qilayotgan yurtboshimiz, Din ishlari boʻyicha Qoʻmita, Oʻzbekiston musulmonlari idorasi rahbariyati va boshqa mutasaddilar haqqiga duoyi-xayrlar qildilar



Taqdirlash marosimini ikkinchi qismida taʼlim muassasasi mudiri Abdulhakim qori Matqulov Qurʼoni karim tilovati, hofizu-kalomulloh boʻlish fazilatlari, ularni hayoti-dunyoda va oxiratdagi darajalari haqida majlisda yigʻilgan ustoz va talabalarga Hadisi shariflardan batafsil bayon qilib berdilar. Abdulhakim qori Matqulov Koʻkaldosh madrasasi Respublikamizda faoliyat yuritayotgan diniy taʼlim muassasalari ichida yagona Qurʼoni karim ilmlariga ixtisoslashtirilgan madrasa boʻlishi haqida aytib oʻtdilar. Shu sababdan madrasa mudiri talabalarga bundan keyin qolgan ilmlar bilan bir qatorda Qurʼoni karimni yod olishga, hamda unga aloqador boʻlgan barcha ilmlarni yanada chuqurroq oʻzlashtirishga, Allohning kalomini koʻp tilovat qilishga chaqirdilar.



Tadbir soʻngida Abdulhakim qori Matqulov Qurʼoni karimni toʻliq yod olgan 3-kurs talabasi Norboyev Dilshodga «Faxriy yorliq» hamda taʼlim muassasasi rahbariyati tomonidan tayyorlangan esdalik sovgʻalarini topshirdilar.

«Koʻkaldosh» oʻrta maxsus islom taʼlim muassasasi Matbuot xizmati






