Turkiyaning Karabük Universitetida ilmiy-amaliy malaka oshirish kurslarida ishtirok etayotgan «Koʻkaldosh» oʻrta maxsus islom bilim yurti professor-oʻqituvchilari uchun belgilangan dastur asosida seminar va uchrashuvlar davom etmoqda.
Dastlab professor-oʻqituvchilar universitetning tarixi, taʼlim tizimi va ilmiy faoliyati bilan tanishdilar. Shuningdek, Ilohiyotshunoslik fakulteti dekani, doktor Abdujabbor Kavak ishtirokida ilmiy-amaliy seminar tashkil etilib, universitetning ilmiy salohiyati, taʼlim jarayonlari va xalqaro hamkorlik yoʻnalishlari haqida batafsil maʼlumot berildi.



Kunning ikkinchi yarmida Oʻzbekistondagi oʻrta maxsus islom bilim yurtlari faoliyati «Koʻkaldosh» oʻrta maxsus islom bilim yurti misolida taqdim etildi. Bilim yurti professor-oʻqituvchisi Ahror domla Abdullayev arab tilida yurtimizdagi diniy taʼlim tizimi va sohada amalga oshirilayotgan islohotlar haqida maʼruza qildi. Shuningdek, Aliakbar domla Abdullayev oʻquv jarayonlarini tashkil etish, taʼlim sifati va ilmiy-amaliy faoliyatni yoʻlga qoʻyish boʻyicha taqdimot oʻtkazdi.




Seshanba kuni Karabük Universiteti professor-oʻqituvchilari bilan tajriba almashish uchrashuvi tashkil etildi. Unda taʼlim sifatini oshirish, zamonaviy pedagogik yondashuvlarni joriy etish hamda oʻquv jarayonlarini samarali tashkil etish masalalari muhokama qilindi. Shuningdek, ishtirokchilar Turkiyadagi Imom-xatib litseylari faoliyati bilan yaqindan tanishib, ilgʻor tajribalarni oʻrgandilar.
Chorshanba kuni esa universitet rahbariyati bilan uchrashuv oʻtkazilib, ikki taʼlim muassasasi oʻrtasida tajriba almashish, qoʻshma ilmiy loyihalarni amalga oshirish va kelgusidagi hamkorlik istiqbollari yuzasidan samarali fikr almashildi.



«Koʻkaldosh» OʻMIBY Matbuot xizmati





