51. Savol: Roʻzador tupugini ogʻzida yigʻib, soʻng uni yutib yuborishi roʻzani buzadimi?
Javob: Bu holatda roʻza buzilmaydi, lekin roʻzador bu ishdan tiyilgani yaxshi.
52. Savol: Kekirish roʻzani buzadimi?
Javob: Kekirish roʻzani buzmaydi, lekin ogʻziga biron narsa keladigan boʻlsa, uni chiqarib tashlashi va darhol ogʻzini undan tozalashi kerak. Mabodo ogʻziga kelgan narsani chiqarib tashlashga qodir boʻla turib, yutib yuborsa yoki uni chiqarib tashlagandan soʻng ogʻzini chayishdan avval soʻlagini yutsa roʻza buziladi.
53. Savol: Roʻzador tomoq chayqaydigan dori isteʼmol qilishining hukmi nima?
Javob: Dori roʻzadorning oshqozoniga tushadigan boʻlsa, roʻzani buzadi. Shuning uchun Ramazonning kunduzida mazkur muolajadan saqlanish lozim.
54. Savol: Qayt qilish roʻzani buzadimi?
Javob: Qasddan qayt qilish roʻzani buzadi. Kishi qasddan qayd qilsa, roʻza buziladi, mabodo roʻzadorga u gʻolib keladigan boʻlsa, buzilmaydi. Faqat sharti biron narsa oshqozonga qaytib ketmasligi kerak. Buning dalili Rasululloh sollallohu alayhi vasallamning quyidagi hadislaridir: “Kishiga qayt gʻolib kelsayu u roʻzador boʻlsa, unga qazo yoʻq, qasddan qayt qilsa, qazo qilsin” Imom Buxoriy rivoyati.
55. Savol: Endoskopiya (Zont yutish) amaliyoti roʻzaga taʼsir qiladimi?
Javob: Mazkur amaliyotni ogʻiz, burun, old va orqa yoʻllaridan amalga oshirish roʻzani buzadi. Amaliyot oʻtalgan roʻzadorga kunning qolgan qismida Ramazon oyining hurmatidan tiyilishi va bu kunning qazosi tutib berishi ham vojibdir.
Roʻzaga mazkur oid savol-javoblar, Iordaniya bosh fatvo boshqarmasida tayyorlangan. (davomi bor)
Mirzaev Kamoliddin






