Hikoyalarda aks etgan “qirq hadis”.
Farzandlarimiz uchun…
7-hadis
Kunlarning birida bir podshoh xalq uning boshqaruviga qanday munosabatda ekanligini bilish maqsadida vaziri bilan shahar aylangani chiqdi. Odamlar uni tanib qolmasligi uchun tashqi koʻrinishi va kiyimlarini oʻzgartirib oldi. Bu vaqtda qishning sovuq kunlari edi. Ular masjid yonidan oʻtib ketayotganlarida sovuqda qaltirab oʻtirgan ikki bechorahol kishiga yoʻliqishdi. Ularning boshpanasi yoʻq edi. Podshoh bu ikki faqirning oʻzaro suhbatlarini eshitish uchun ularga yaqinroq bordi. Ulardan biri sovuqdan shikoyat qilib shunday hazil qilar edi:
“Ertaga jannatga tushsam u yerga podshohimizni kiritmayman! Agar mabodo jannatni eshiklariga yaqinlashayotganini koʻrsam, mana shu oyoq kiyimimni yechib boshiga otaman”.
Ikkinchisi ham qiziqib: “Nega sen uni jannatga kiritmaysan?”, -dedi. Shunda haligi sherigi :” Albatta kiritmaymanda, biz bu yerda sovuqdan egilib ketyabmizku, u boʻlsa bizni hatto borligimizni ham bilmaydi. Yana birdan jannatdagi qoʻshnimiz boʻlib qolsa-ya. Bilasanmi doʻstim, men bunday beparvo kishi jannatda qoʻshnim boʻlishini xohlamayman!”- deya javob berdi. Ular ikkisi birdan kulib yuborishdi.
Bu gaplarni eshitgan podshoh vaziriga qarab: “Bu ikkisini eslab qol!”- dedi. Saroyga qaytib kelganlaridan keyin esa oʻsha ikki kambagʻalni keltirish uchun masjidga odam yubordi. Bu ikki bechora qoʻrquv iskanjasida saroyda oʻzlarini nimalar kutayotganidan xavotirda edilar. Ammo ularni sharoitlari juda qulay boʻlgan bir uyga olib keldilar va: “Sizlar bu yerda istaganingizcha yeb-ichishingiz, yashashingiz mumkin hamda podshohimizning haqqiga duo qilasizlar, ammo u kishining jannatga kirishiga qarshilik qilmaysizlar”-deyildi.
Podshohning tutgan yoʻli naqadar goʻzal! Zero Nabiy sollallohu alayhi va sallam mana shunday bechorahol insonlarga yordam berganlar haqida bunday deganlar:
(من نفس عن مؤمن كربة من كرب الدنيا نفس الله عنه كربة من كرب الآخرة)
“Kimki bir moʼminni bu dunyodagi qiyinchilikdan qutqarsa, Alloh taolo uni oxiratdagi qiyinchilikdan qutqaradi”.
Oxunjon AHMEDOV tarjimasi
«Koʻkaldosh» OʻMIBY mudarrisi






