Baʼzi sahobalarga Rasululloh sollallohu alayhi vasallam ularning tiriklik vaqtlaridayoq jannatiy boʻlishlarini xabar berganlar. Rasululloh sollallohu alayhi vasallam bir hadislarida ularning oʻntasini nomma-nom sanaganlar. “Asharai mubashshara” (bashorat berilgan oʻn kishi) nomi bilan mashhur boʻlgan sahobalar quyidagi zotlardir:
عَنْ عَبْدِ الرَّحْمَنِ بْنِ عَوْفٍ قَالَ قَالَ رَسُولُ اللَّهِ صَلَّى اللهُ عَلَيْهِ وَسَلَّمَ أَبُو بَكْرٍ فِى الْجَنَّةِ وَعُمَرُ فِى الْجَنَّةِ وَعُثْمَانُ فِى الْجَنَّةِ وَعَلِىٌّ فِى الْجَنَّةِ وَطَلْحَةُ فِى الْجَنَّةِ وَالزُّبَيْرُ فِى الْجَنَّةِ وَعَبْدُ الرَّحْمَنِ بْنُ عَوْفٍ فِى الْجَنَّةِ وَسَعْدٌ فِى الْجَنَّةِ وَسَعِيدٌ فِى الْجَنَّةِ وَأَبُو عُبَيْدَةَ بْنُ الْجَرَّاحِ فِى الْجَنَّةِ. رَوَهُ التِّرْمِذِيُّ
Abdurahmon ibn Avf raziyallohu anhudan rivoyat qilinadi: “Rasululloh sallallohu alayhi vasallam: “Abu Bakr jannatda boʻladi, Umar jannatda boʻladi, Usmon jannatda boʻladi, Ali jannatda boʻladi, Talha jannatda boʻladi, Zubayr jannatda boʻladi, Abdurahmon ibn Avf jannatda boʻladi, Saʼd jannatda boʻladi, Saʼiyd jannatda boʻladi, Abu Ubayda ibn Jarroh jannatda boʻladi”, – dedilar”. Termiziy rivoyat qilgan.
Imom Buxoriy rahmatullohi alayh rivoyat qilgan boshqa bir hadisda esa Rasululloh sollallohu alayhi vasallamning Fotima roziyallohu anhoga shunday deganlari rivoyat qilingan:
أَمَا تَرْضَيْنَ أَنْ تَكُونِى سَيِّدَةَ نِسَاءِ أَهْلِ الْجَنَّةِ.
“Jannat ahli ayollarining sayyidasi boʻlishingga rozi boʻlmaysanmi!”.
Imom Nasoiy[6] rivoyat qilgan hadisda esa Rasululloh sollallohu alayhi vasallam nabiralari Hasan va Husayn roziyallohu anhumolar haqida shunday deganlari rivoyat qilingan:
أَنَّ الْحَسَنَ وَالْحُسَيْنَ سَيِّدَا شَبَابِ أَهْلِ الْجَنَّةِ.
“Albatta, Hasan va Husayn jannat ahli yigitlarining sayyidlaridir”.
Xulosa shuki, hadisi shariflarda nomlari aytilgan sahobalarni jannatiy deb eʼtiqod qilinadi. Nomlari aytilmagan sahobalar haqida esa jannatiy boʻlishlari boshqalardan koʻra koʻproq umid qilinadi.
NAMOZOV GʻUFRON BITIRUVCHI KURS TALABASI






