Bugun Koʻkaldosh oʻrta maxsus islom taʼlim muassasasida Oʻzbekiston musulmonlari idorasi mutaxassislari ishtirokida talabalarning huquqiy savodxonligini oshirishga qaratilgan maʼrifiy tadbir boʻlib oʻtdi.
Tadbirda muassasa mudiri M.Erkayev, maʼnaviy-maʼrifiy ishlar boʻyicha mudir oʻrinbosari A.Gʻaniyev, Oʻzbekiston musulmonlari idorasi “Huquqshunoslik” boʻlimi boshligʻi J.Xotamov hamda Oʻzbekiston musulmonlari idorasi “Huquqshunoslik” boʻlimi mutaxassisi, huquqshunos A.Agzamov ishtirok etdi.



Tadbirni muassasa mudiri M.Erkayev kirish soʻzi bilan ochib berdi. U bugungi kunda zamonaviy qonunchilikni chuqur oʻrganish, diniy sohaga oid qonun hujjatlari bilan muntazam tanishib borish va ulardagi yangilanishlardan doimo xabardor boʻlish boʻlajak din xizmatchilari uchun naqadar zarur ekaniga alohida urgʻu berdi.
📚 Soʻngra tashrif buyurgan mutaxassislar talabalarni soha faoliyatini tartibga soluvchi qonunlarning mazmun-mohiyati bilan tanishtirdi. Suhbat davomida quyidagi dolzarb masalalarga atroflicha toʻxtalib oʻtildi:
noqonuniy diniy taʼlimning salbiy oqibatlari va unga qarshi kurash;
norasmiy yashirin nikohning huquqiy va ijtimoiy xatarlari;
ijtimoiy tarmoqlarda noqonuniy kontentlardan saqlanish va ularni tarqatmaslik masʼuliyati.
Mutaxassislar har bir mavzuni hayotiy misollar asosida tushuntirib, dinni toʻgʻri anglash va qonunga hurmat bir-birini toʻldiruvchi qadriyatlar ekanini taʼkidladi.
Tadbir soʻngida talabalarni qiziqtirgan savollarga mutaxassislar tomonidan batafsil javoblar berildi. Ochiq muloqot shaklida oʻtgan suhbat talabalarda katta qiziqish uygʻotdi.




Bunday uchrashuvlar talabalarning huquqiy ongi va madaniyatini yuksaltirish, ularni jamiyatda qonun ustuvorligini qadrlaydigan, maʼrifatli va masʼuliyatli soha mutaxassislari etib tarbiyalashda muhim ahamiyat kasb etadi.
«Koʻkaldosh» oʻrta maxsus islom taʼlim muassasasi
Matbuot xizmati






