“Koʻkaldosh” oʻrta maxsus islom bilim yurtida “Arab tili fani oyligi” doirasida maʼnaviy-maʼrifiy tadbir tashkil etildi. Ushbu tadbirda Misr Arab Respublikasidan Toshkent islom instituti katta oʻqituvchisi Ustoz Shayx Ibrohim Abdulkarim hamda ustoz S. Qurbonov ishtirok etdilar.


Mehmonlar tadbir davomida arab tilining islom ilmlaridagi oʻrni, uning mohiyati, tarixiy ahamiyati hamda arab tiliga oid ilmlar — nahv, sarf, balogʻat va boshqa fanlarning Qurʼon va hadis ilmlarini oʻrganishdagi muhimligi haqida atroflicha maʼruzalar qildilar. Jumladan, Ustoz Shayx Ibrohim Abdulkarim soʻzga chiqib, yurtimizda diniy-maʼrifiy sohada amalga oshirilayotgan keng koʻlamli islohotlarga alohida toʻxtaldi. U oʻz nutqida:
“Bugungi kunda Oʻzbekistonda ilm va maʼrifatga, xususan, islom ilmlari va arab tilini oʻrganishga katta eʼtibor qaratilayotgani quvonarli hol. Yaratilayotgan shart-sharoitlar yoshlarning chuqur bilim olishiga mustahkam zamin boʻlib xizmat qilmoqda”,
— deya taʼkidladi.


Shuningdek, Ustoz Shayx Ibrohim Abdulkarim taʼkidlashicha, ushbu islohotlar natijasida talabalarning ilmiy salohiyati oshib, arab tilini puxta egallash orqali Qurʼon va hadis ilmlarini yanada teran anglash imkoniyati kengaymoqda. Ularning chiqishlari talabalar uchun juda foydali va qiziqarli boʻlib, arab tilini chuqur oʻrganishga boʻlgan qiziqishni yanada oshirdi.
Mazkur tadbir doirasida arab tiliga oid oʻquv, ilmiy va manbaviy adabiyotlardan iborat koʻrgazma ham tashkil etildi. Ushbu koʻrgazmada nahv, sarf, balogʻat, tafsir va hadis ilmlariga oid nodir hamda zamonaviy adabiyotlar namoyish etilib, talabalar uchun katta qiziqish uygʻotdi.
Mazkur tadbirda bilim yurti mudiri, islomshunoslik fanlari boʻyicha falsafa doktori (PhD) M. Erkayev ham qatnashib, soʻzga chiqdi. U kishi oʻz nutqida arab tilining diniy taʼlimdagi beqiyos ahamiyatini taʼkidlab, yosh talabalarni ilm olishda qatʼiyatli boʻlishga, til ilmlarini puxta egallashga daʼvat etdi.


Tadbirda bilim yurti ustoz-muallimlari, xodimlari hamda talabalar faol ishtirok etdilar. Suhbatlar savol-javoblar bilan boyitilib, samimiy va ilmiy ruhda oʻtdi.



Ushbu tadbir “Arab tili fani oyligi” doirasidagi muhim uchrashuvlardan biri boʻlib, talabalar bilimini oshirish, ularning ilmiy va maʼnaviy dunyoqarashini kengaytirishda muhim ahamiyat kasb etdi.
A.Gʻaniyev
“Koʻkaldosh” OʻMIBY Maʼnaviy-maʼrifiy ishlar boʻyicha mudir oʻrinbosari






