Имом Абу Закариё Яҳё ибн Шароф Нававий “Ат-Тибён фий ҳамалатил Қуръон” китобида шундай ёзадилар:
Ибн Абу Довуд баъзи салафлардан улар ҳар икки ойда Қуръонни бир маротаба хатм қилганликларини, баъзилари эса ҳар ойда, баъзилари ҳар ўн кунда, баъзилари ҳар саккиз кечада, баъзилари ҳар етти кечада, баъзилари ҳар олти кечада, баъзилари ҳар беш кечада, баъзилари ҳар тўрт кечада, баъзилари эса ҳар уч кечада, баъзилари ҳар икки кечада хатм қилганларини ривоят қилади.
Кўпчилик салафларимиз эса бир кеча-кундузда хатм қилишган, баъзилари эса бир кеча-кундузда икки маротаба хатм қилишган, баъзилари эса уч маротаба хатм қилишган, ҳатто баъзилари саккиз маротаба хатм қилишган: тўрт марта кундузи, тўрт марта кечаси.
Ҳар кеча-кундузда бир маротаба хатм қиладиганлардан Усмон ибн Афвон, Тамим ад-Дарий, Саъид ибн Жубайр, Мужоҳид, имом Шофеъий ва бошқалар.
Ҳар куни уч маротаба хатм қиладиганлардан: Салим ибн Иътр (Муовия розияллоҳу анҳу даврларида Мисрнинг қозиси).
Абу Бакр ибн Абу Довуд ҳар куни кечаси уч маротаба хатм қилишини ривоят қилган.
Абу Умар Киндий “Миср қозилари” китобида ҳар кечаси тўрт маротаба хатм қилишини ривоят қилган.
Шайх имом Абу Абдурроҳман Суламий айтади: “Абу Усмон Мағрибийни Ибнул Катиб роҳимахуллоҳ кундузи тўрт маротаба, кечаси тўрт маротаба хатм қилишлини айтганини эшитганман. Бу бизга хабари етиб келган энг кўп хатм қилиш ҳисобланади.
✍️ Пўлат Зийнатуллоҳ
«Кўкалдош» ЎМИБЮ 3-курс талабаси






