6-aprel kuni «Koʻkaldosh» oʻrta maxsus islom bilim yurti «Nazarbek» talabalar turar joyida XATMI QURʼON kechasi boʻlib oʻtdi.




Xatmonada bilim yurti mudiri Abdulhakim qori Matqulov, mudarris va talabalar ishtirok etishdi. Xatmona soʻnggida xayrli duolar qilish bilan birga muborak oy davomida oʻtkazilgan bir necha tadbir va musobaqalar yakunlariga koʻra gʻoliblar taqdirlandi.

Jumladan, muborak Ramazon oyida oʻzining chiroyli ovozi bilan bir oy davomida Qurʼoni karimni xatm qilib bergan 1-kurs talabasi Muhammadfotih qori Murodullayevning ota-onasi shunday farzandni voyaga yetkazib, tarbiyalagani uchun bilim yurti tomonidan tashakkurnoma hamda qoriga UMRA SAFARI YOʻLLANMASI va qimmatbaho esdalik sovgʻalari topshirildi;

Bundan tashqari Ramazon oyi munosabati bilan oʻtkazilgan Qurʼoni karimni koʻp xatm qilish boʻyicha musobaqa gʻoliblari ham taqdirlandi.
Unga koʻra, 28 kun davomida Kalomi sharifni 12 marta xatm qilgan Qambaraliyev Kozim uchinchi, 14 ta xatm bilan Begmonov Islom ikkinchi hamda 17 ta xatm bilan Rajabov Shuhrat birinchi oʻrinni egallashdi va munosib sovgʻalar bilan taqdirlanishdi;



Saudiya Arabistoni tomonidan tashkil qilingan «Sufaro» onlayn Qurʼon musobaqasining 23-kungi sonida muvaffaqqiyatli ishtirok etib, faxrli ikkinchi oʻrinni qoʻlga kiritgan 3-kurs talabasi Ismoilov Muhammadaminga maqtov yorligʻi va esdalik sovgʻalari berildi;

Muborak oy davomida saharlik va iftorlik dasturxonlarini tashkil qilishda jonkuyarlik bilan xizmat qilgan 3-kurs talabasi Karimov Zikrullohga va 3-kurs talabasi Rahmatullayev Ulugʻbekning ota-onalariga shunday farzandni voyaga yetkazib, tarbiyalagani uchun bilim yurti tomonidan tashakkurnoma hamda esdalik sovgʻalari topshirildi;


Shuningdek, Ramazon oyida saharlik va iftorlik dasturxonlarini tashkil qilishda erta-yu kech, tinim bilmasdan xizmat qilgani hamda Xatmi Qurʼon ibodatini tashkil qilishda jonbozlik koʻrsatgani uchun Sunnatov Azizjon va Homidov Jamshid domlaga tashakkurnoma hamda esdalik sovgʻalari topshirildi.


Sovgʻalarni bilim yurti mudiri Abdulhakim qori Matqulov va bilim yurti mudarrisi Ahror domla Abdullayevlar topshirishdi.
«Koʻkaldosh» OʻMIBY matbuot xizmati






